پرەمەر-ءمينيستردىڭ ءبىرىنشى ورىنباسارى رومان سكليار سەمەيدەگى الاپات ورتتەن زارداپ شەككەن كاسىپكەرلەردىڭ شىعىنى قانداي جاعدايدا وتەلەتىنىن ءتۇسىندىردى. ول ۇكىمەتتىڭ كەڭەيتىلگەن وتىرىسىنان كەيىن جۋرناليستەردىڭ سۇراعىنا جاۋاپ بەرلى، دەپ حابارلايدى “ادىرنا” ۇلتتىق پورتالى.
پرەمەر-ءمينيستردىڭ ورىنباسارى تامارا دۇيسەنوۆا وقيعا ورنىندا ارنايى كوميسسيا جۇمىس ىستەپ جاتقانىن اتاپ ءوتتى.
«بىرىنشىدەن، ولار ءورتتىڭ سەبەبىن انىقتاپ جاتىر. ەكىنشىدەن، وبلىس اكىمدىگىنىڭ ماعان بەرگەن مالىمەتىنە سايكەس، (وقيعا ورنىندا) بازار يەسى جۇمىس ىستەۋدە. قازىر ءورتتىڭ سەبەبى مەن (بازارداعى) ءاربىر ادامعا كەلگەن زالالدىڭ كولەمىن انىقتاۋ كەرەك. كوميسسيا شەشىمىنەن كەيىن عانا (كومەك بەرۋ ماسەلەسى) قارالادى»، - دەدى ۆيتسە-پرەمەر.
باق وكىلى «ۇكىمەت رەزەرۆىنەن زارداپ شەككەن كاسىپكەرلەرگە قارجى بولىنە مە؟» دەپ سۇراعىن ناقتىلادى.
ال رومان سكليار سەمەيدەگى ورتتەن زارداپ شەككەن كاسىپكەرلەر كومەكسىز قالمايتىنىن ايتتى.
«زاڭ تاراپىنان (ونداي كومەك) قاراستىرىلماعان. قازىر ءورت ءالى سوندىرىلمەدى. تامارا قاسىمقىزى شىعىن ەسەپتەلىپ جاتقانىن ايتتى. سودان كەيىن ارنايى كوميسسيا ءتيىستى شەشىمدى قابىلدايدى. بازار يەسى دە كومەكتەسۋى كەرەك. ادامداردى مۇنداي قيىن جاعدايدا (كومەكسىز) قالدىرمايمىز. مۇنى سىزگە ناقتى ايتامىن»، - دەدى رومان سكليار.
ەسكە سالايىق، بۇعان دەيىن سەمەيدەگى ءىرى بازارلاردىڭ بىرىنەن ءورت شىققانى تۋرالى حابارلادىق.
