"Qazaqstan" ۇلتتىق ارناسىنىڭ "جەدەل جەلى" باعدارلاماسىنا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قاتىستى، دەپ حابارلايدى "ادىرنا" ۇلتتىق پورتالى.
تىكەلەي ەفير بارىسىندا قوعامنىڭ ساندىق ساۋاتىن قالىپتاستىرۋ، IT مەكتەپ، اقپاراتتىق قاۋىپسىزدىك، ينتەرنەت سىندى ماسەلەلەر تالقىلاندى.
- IT مەكتەپتە وقىعان ءاربىر ادام ءۇشىن مەملەكەتتەن 600 مىڭ تەڭگە ءبولىنىپ جاتىر. كوبىسى مۇناي سالاسىندا قىزمەت ەتسەم، جاقسى جالاقى الامىن دەپ ويلايدى. بىراق IT ماماندىعىمەن ءوز مۇمكىندىگىڭە ساي 2000-3000 دوللار جالاقى الۋعا بولادى. قازاقستاندا وتىرىپ-اق شەتەلدىك الىپ تەحنولوگيالىق كومپانيالاردا جۇمىس ىستەۋگە بولادى، - دەدى مۋسين.
سونىمەن قاتار، مينيستر وتانىمىزدا ەكسپورتتىق IT ءونىمنىڭ دە ارتىپ كەلە جاتقانىن مالىمدەدى. اقپاراتتىق ءونىمنىڭ 3 جىل ىشىندە 10 ەسە وسكەنىن حابارلادى.
- IT يندۋستريامىز دامىپ جاتىر. سوندىقتان جاستار بۇل باعىتقا بەت بۇرۋى كەرەك، - دەدى مينيستر.
"ادىرنا" ۇلتتىق پورتالى
