جاڭا ورامدار مەن الەۋمەتتىك نىسانداردىڭ پايدا بولۋىنا بايلانىستى استانا قالاسىنىڭ ەنەرگەتيكالىق ينفراقۇرىلىمىنا تۇسەتىن جۇكتەمە سول جاعالاۋ اۋداندارىن سالۋ كەزىندە كۇتكەن قارقىننان دا جىلدام ءوسىپ كەلەدى. ەلەكترمەن جابدىقتاۋدىڭ تيىمدىلىگىن ساقتاۋ ءۇشىن ەلوردادا «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا تاراتۋ جەلىلەرىن قايتا جاڭارتۋ باستالدى.
«استانا-وەك» اق كابەل جەلىلەرىنىڭ ەكى ۋچاسكەسىن جاڭارتۋعا 1,5 ملرد تەڭگەگە جۋىق قارجى باعىتتايدى.
قارقىندى دامىپ كەلە جاتقان ەسىل اۋدانىنداعى جۇمىستار كەرنەۋى 20 كۆ، جالپى ۇزىندىعى 7,08 كم كابەلدەردى اۋىستىرۋدى كوزدەيدى. قولدانىستاعى جەلىلەردىڭ سالىنعانىنا بارى-جوعى 10 جىل بولسا دا، ەلەكتر ەنەرگياسىن تۇتىنۋدىڭ ءوسۋى تاراتۋ جەلىلەرىندەگى قۋاتتىڭ جەتكىلىكسىز بولۋى سەكىلدى ماسەلەنى شەشۋدى تالاپ ەتىپ وتىر.
«وليمپ» جانە «اۋەجاي» قوسالقى ستانتسيالارىنان باستالاتىن ۋچاسكەلەردە مونتاجداۋعا دايىندىق جۇمىستارى ءجۇرىپ جاتىر. كابەل كانالىن سالۋ ءۇشىن توپىراق قازىلىپ، باقىلاۋ كامەرالارىنا نەگىز دايىندالدى، سونداي-اق ولاردى بەتونداۋ جۇمىستارى جۇرگىزىلۋدە. بۇدان بولەك، ماماندار حۋسەين بەن تالال كوشەسى ارقىلى قۇبىر وتكەلىن سالىپ جاتىر. بۇگىنگى تاڭدا نىساننىڭ دايىندىعى 8%، ونى تولىق ىسكە اسىرۋعا 1,3 ملرد تەڭگە جۇمسالادى.
قۇنى 202,9 ملن تەڭگەنى قۇرايتىن ەكىنشى جوبا بويىنشا كەرنەۋى 0,4 كۆ، جالپى ۇزىندىعى 9,6 كم كابەل جەلىسىن قايتا جاڭارتۋ جوسپارلانعان. ول «استانا بالەت» تەاترى مەن قازاق ۇلتتىق حورەوگرافيا اكادەمياسى توڭىرەگىندەگى نىسانداردى ەلەكتر قۋاتىمەن قامتاماسىز ەتەدى.
بۇگىنگى تاڭدا 4,8 كم جاڭا جەلى تارتىلدى، بۇل جوسپارلانعان كولەمنىڭ 60%-ىن قۇرايدى. جۇمىس جىلدام ءجۇرىپ جاتىر، ويتكەنى جاڭا تراسسالار سالۋدىڭ قاجەتى جوق. سەبەبى كابەلدەر بۇرىننان بار ارنالار مەن قۇبىر وتكەلدەرىندە اۋىستىرىلادى.
جوبانى ىسكە اسىرۋ ەلەكترمەن جابدىقتاۋ جۇيەسىن نىعايتادى، تەحنولوگيالىق بۇزۋشىلىقتار مەن اپات جاعدايىندا اجىراتۋلار قاۋپىن تومەندەتەدى جانە استانانىڭ ەڭ جىلدام وسەتىن اۋداندارىنىڭ ءبىرىن دامىتۋ ءۇشىن ينفراقۇرىلىمدىق قور قۇرادى.
