جۋسان ءيىسى. تالاي اقىن-جازۋشىنىڭ شىعارماسىندا تۋعان ەلدىڭ، قاسيەتتى مەكەننىڭ قۇدىرەتى وسى جۋسان ارقىلى سۋرەتتەلەدى. قارا جەردىڭ توپىراعىندا قاپتاعان جۋساننىڭ ءيىسىن، اششى ءدامىن قولدا باردا ەشكىم تۇسىنبەس. سىرت كوزگە ءجاي وسىمدىك بولىپ كورىنەتىن بۇل عالاماتتىڭ قادىرىن تەك ەلدەن جىراق كەتكەندەر عانا ۇعىنار. ءسوزىمىزدىڭ دالەلى - "جۋسان" وپەراتسياسى ارقىلى ەلگە ورالىپ، اداسىپ بارىپ، ءوز جولىن قايتا تاپقاندار بولماق.
"جۋسان" وپەراتسياسى - قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ باستاۋىمەن قولعا الىنىپ، وتانداستارىمىزدى ەلگە قايتارعان ناتيجەلى جۇمىستاردىڭ ءبىرى بولدى. 2019 جىلدىڭ قاڭتارىنان 2021 جىلدىڭ اقپان ايىنا دەيىن جۇزەگە اسىرىلعان وپەراتسيانىڭ قۇنى قىمبات! سەبەبى قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ مالىمەتتەرى بويىنشا بۇل ىستە 607 ادام قۇتقارىلدى. ونىڭ ىشىندە 37 ەر ادام، 157 ايەل، 413 بالا بولسا، ونىڭ 34-ءى ەلگە جەتىم ورالدى.
قازاق جەتىمىن جىلاتپاعان، جەسىرىن ۇزاتپاعان داناگوي حالىق. "باۋىرلارعا كومەكتەسەمىز. ناعىز مۇسىلماندار ەلىنە اتتانامىز!" دەپ اتويلاتقان جەرلەستەرىمىزگە كومەك بەرىپ، ەلگە قايتارۋ ءۇشىن 5 ايلىق قۇپيا ءارى مىقتى دايىندىق قاجەت بولدى. ەلگە ورالعانداردىڭ اراسىندا جەسىر اتانىپ، كۇيەۋىن جوعالتقاندار، اتا-اناسىنان ايىرىلىپ، وتباسى بۇزىلعاندار بار. بۇگىندە ولاردىڭ وتكەنى قۇپيا، بۇگىنى - بەلگىسىز، بولاشاعىن بولجاۋ مۇمكىن ەمەس. قوعامنان كورسەتىلەر شەكتەۋلەر مەن تەرىس كوزقاراستار بولمايدى. سيريادان كەلگەندەردىڭ اتى-ءجونى، ءتۇر-تۇلعاسى، تاريحى، ءبارى-ءبارى قۇپيا بولىپ قالا بەرەدى. "ەسىڭ باردا ەلىڭدى تاپ" دەگەندەردىڭ قاتارىندا بولاشاعى ءۇشىن جۇمىس جاساپ، باقىتتى ومىرگە قادام باسقاندار دا جوق ەمەس. سونىڭ ءبىرى - ماريام (ەسىمى وزگەرتىلگەن).
ماريام - 2010 جىلى ءوز تەڭىن تاۋىپ، 18 جاسىندا تۇرمىس قۇرعان. جولداسى دىنگە قاتتى بەت بۇرعاندىقتان وعان حيدجاب كيىپ، ۇيدە وتىرۋىن تالاپ ەتەدى. "ناعىز مۇسىلمان ايەل - كۇيەۋىنە قارسى شىقپاي، ايتقانىن ورىنداپ،سوڭىنان ءجۇرۋى كەرەك" دەگەن قاعيدا قالىپتاسقان ماريام ونىمەن 2012 جىلى سيرياعا اتتانۋعا دا قارسىلىق تانىتپاي، كەلىسىم بەرگەن. الايدا اتا-اناسىنا كۇيەۋىمەن وزگە مەملەكەتكە دەمالىسقا اتتانىپ بارا جاتقانىن ايتقان. "سيريا - اشارشىلىق، ادامداردىڭ ولىكتەرى، جالاڭ-اياق جۇگىرگەن، اشىققان بالالار، كىشكەنتاي جىلاعان سابيلەر.مەنىڭ ەسىمدە تەك وسى قالدى. كۇيەۋىم مەن مەنىڭ قانداي قورلىق كورگەنىمىزدى ەسكە العىم دا كەلمەيدى", - دەپ قىسقا قايىردى.
ارادا وتكەن ءبىراز ۋاقىتتان سوڭ ەلىن ساعىنىپ، كەرى قايتۋدى سۇراعان ايەل جولداسىنان تەرىس جاۋاپ الادى. بىراق ماريامنىڭ وتباسىنا تونگەن قاۋىپ تىم باسقا ەدى. سيرياداعى قيىن جاعدايدان كۇيەۋىن جوعالتقان ول ەلگە قايتۋدىڭ بارلىق جولىن قاراستىرادى. وسىلايشا 2019 جىلى "جۋسان" ارقىلى قازاقستانعا ورالىپ، پسيحولوگتىڭ كومەگىنە جۇگىنىپ، وزىمەن جۇمىس جاساي باستاعان. بۇگىندە ول الەۋمەتتىك جەلىلەردە بەلسەندى بولعانىمەن، وتكەنىندە جاساعان قاتەلىكتى ەسكە العىسى دا، ودان سىر شەرتكىسى دە كەلمەيدى. ءدال قازىر پسيحولوگياعا قىزىعىپ، ءوزى سەكىلدى ەرتە تۇرمىس قۇرىپ، قادامىن شالىس باسقاندارعا كومەك بەرۋدە. ونىڭ ايتۋىنشا، "جۋسان" وپەراتسياسى سيريادان كەلگەن ءار قازاقستاندىققا جاڭا تىنىس بەرىپ، ەكىنشى ءومىر سىيلاعان.
سىمبات ناۋحان
“ادىرنا” ۇلتتىق پورتالى
