گەرمانيا ىشكى ىستەر مينيسترلىگى مەن سىرتقى ىستەر مينيسترلىگى اراسىندا سيرياعا دەپورتاتسيانى قايتا باستاۋ جوسپارىنا بايلانىستى اشىق كەلىسپەۋشىلىك ورىن الدى، دەپ حابارلايدى "ادىرنا" ۇلتتىق پورتالى.
بۇل تۋرالى BILD باسىلىمى حابارلادى.
ىشكى ىستەر مينيسترلىگى كواليتسيالىق كەلىسىمگە سايكەس، دەپورتاتسيانى الدىمەن قىلمىس جاساعان ميگرانتتاردان باستاۋ قاجەت دەپ سانايدى. ۆەدومستۆو وكىلدەرى بەرليننىڭ داماسكپەن دەپورتاتسياعا رۇقسات بەرۋ تۋرالى كەلىسىم بويىنشا كەلىسسوزدەر جۇرگىزىپ جاتقانىن مالىمدەدى. سونداي-اق، بوسقىندار جونىندەگى فەدەرالدى باسقارما سيريالىق ازاماتتاردىڭ، اسىرەسە وتباسىنسىز كەلگەن جاس، ەڭبەككە جارامدى ەر ادامداردىڭ ىستەرىن قايتا قاراۋدى باستاعان.
الايدا بۇل ۇستانىمعا سىرتقى ىستەر ءمينيسترى يوحانن ۆادەفۋل قارسى شىقتى. ول جاقىندا قيراعان داماسك قالاسىنا ساپارمەن بارىپ، «مۇنداي اۋقىمدى قيراۋدى بۇرىن-سوڭدى كورمەگەنىن» ايتتى. ءمينيستردىڭ پىكىرىنشە، قازىرگى جاعدايدا سيريالىق بوسقىنداردىڭ ەلىنە ورالۋى وتە شەكتەۋلى عانا جاعدايلاردا مۇمكىن، سەبەبى ەلدىڭ ينفراقۇرىلىمى قاتتى بۇلىنگەن.
ىشكى ىستەر مينيسترلىگى، كەرىسىنشە، ورالۋشىلار ءۇشىن جاعداي جاساۋعا بولادى دەپ ەسەپتەيدى.
مامانداردىڭ ايتۋىنشا، گەرمانيادا بۇل ماسەلە كواليتسيا ىشىندەگى ساياسي قايشىلىقتى تەرەڭدەتە ءتۇسۋى مۇمكىن، ال ادام قۇقىقتارىن قورعاۋشىلار سيرياعا دەپورتاتسيانى قايتا باستاۋ بوسقىنداردىڭ ومىرىنە قاۋىپ توندىرەتىنىن ەسكەرتىپ وتىر.
