Jusan iısı. Talai aqyn-jazuşynyŋ şyǧarmasynda tuǧan eldıŋ, qasiettı mekennıŋ qūdıretı osy jusan arqyly suretteledı. Qara jerdıŋ topyraǧynda qaptaǧan jusannyŋ iısın, aşy dämın qolda barda eşkım tüsınbes. Syrt közge jäi ösımdık bolyp körınetın būl ǧalamattyŋ qadırın tek elden jyraq ketkender ǧana ūǧynar. Sözımızdıŋ dälelı - "Jusan" operasiiasy arqyly elge oralyp, adasyp baryp, öz jolyn qaita tapqandar bolmaq.
"Jusan" operasiiasy - Qazaqstan Respublikasynyŋ Tūŋǧyş Prezidentı Nūrsūltan Nazarbaevtyŋ bastauymen qolǧa alynyp, Otandastarymyzdy elge qaitarǧan nätijelı jūmystardyŋ bırı boldy. 2019 jyldyŋ qaŋtarynan 2021 jyldyŋ aqpan aiyna deiın jüzege asyrylǧan operasiianyŋ qūny qymbat! Sebebı Qazaqstan Respublikasy Ūlttyq qauıpsızdık komitetınıŋ mälımetterı boiynşa būl ıste 607 adam qūtqaryldy. Onyŋ ışınde 37 er adam, 157 äiel, 413 bala bolsa, onyŋ 34-ı elge jetım oraldy.
Qazaq jetımın jylatpaǧan, jesırın ūzatpaǧan danagöi halyq. "Bauyrlarǧa kömektesemız. Naǧyz mūsylmandar elıne attanamyz!" dep atoilatqan jerlesterımızge kömek berıp, elge qaitaru üşın 5 ailyq qūpiia ärı myqty daiyndyq qajet boldy. Elge oralǧandardyŋ arasynda jesır atanyp, küieuın joǧaltqandar, ata-anasynan aiyrylyp, otbasy būzylǧandar bar. Bügınde olardyŋ ötkenı qūpiia, bügını - belgısız, bolaşaǧyn boljau mümkın emes. Qoǧamnan körsetıler şekteuler men terıs közqarastar bolmaidy. Siriiadan kelgenderdıŋ aty-jönı, tür-tūlǧasy, tarihy, bärı-bärı qūpiia bolyp qala beredı. "Esıŋ barda elıŋdı tap" degenderdıŋ qatarynda bolaşaǧy üşın jūmys jasap, baqytty ömırge qadam basqandar da joq emes. Sonyŋ bırı - Mariiam (esımı özgertılgen).
Mariiam - 2010 jyly öz teŋın tauyp, 18 jasynda tūrmys qūrǧan. Joldasy dınge qatty bet būrǧandyqtan oǧan hidjab kiıp, üide otyruyn talap etedı. "Naǧyz mūsylman äiel - küieuıne qarsy şyqpai, aitqanyn oryndap,soŋynan jüruı kerek" degen qaǧida qalyptasqan Mariiam onymen 2012 jyly Siriiaǧa attanuǧa da qarsylyq tanytpai, kelısım bergen. Alaida ata-anasyna küieuımen özge memleketke demalysqa attanyp bara jatqanyn aitqan. "Siriia - aşarşylyq, adamdardyŋ ölıkterı, jalaŋ-aiaq jügırgen, aşyqqan balalar, kışkentai jylaǧan säbiler.Menıŋ esımde tek osy qaldy. Küieuım men menıŋ qandai qorlyq körgenımızdı eske alǧym da kelmeidı", - dep qysqa qaiyrdy.
Arada ötken bıraz uaqyttan soŋ elın saǧynyp, kerı qaitudy sūraǧan äiel joldasynan terıs jauap alady. Bıraq Mariiamnyŋ otbasyna töngen qauıp tym basqa edı. Siriiadaǧy qiyn jaǧdaidan küieuın joǧaltqan ol elge qaitudyŋ barlyq jolyn qarastyrady. Osylaişa 2019 jyly "Jusan" arqyly Qazaqstanǧa oralyp, psihologtyŋ kömegıne jügınıp, özımen jūmys jasai bastaǧan. Bügınde ol äleumettık jelılerde belsendı bolǧanymen, ötkenınde jasaǧan qatelıktı eske alǧysy da, odan syr şertkısı de kelmeidı. Däl qazır psihologiiaǧa qyzyǧyp, özı sekıldı erte tūrmys qūryp, qadamyn şalys basqandarǧa kömek berude. Onyŋ aituynşa, "Jusan" operasiiasy Siriiadan kelgen är qazaqstandyqqa jaŋa tynys berıp, ekınşı ömır syilaǧan.
Symbat Nauhan
“Adyrna” ūlttyq portaly
