رەسەي سىرتقى ىستەر مينيسترلىگى باشار اسادتىڭ سيريا پرەزيدەنتى قىزمەتىنەن كەتكەنىن رەسمي تۇردە جاريالادى، دەپ حابارلايدى "ادىرنا" ۇلتتىق پورتالى كازتاگ-قا سىلتەمە جاساپ.
«اساد پرەزيدەنتتىك قىزمەتتەن كەتىپ، بيلىكتى بەيبىت جولمەن بەرۋ تۋرالى شەشىم قابىلدادى»، – دەپ مالىمدەدى رەسەي ءسىم.
بۇعان دەيىن باشار اسادتىڭ سيريادان قاشىپ كەتكەنى جانە بيلىكتى قارۋلى وپپوزيتسيانىڭ باسىپ العانى تۋرالى حابارلانعان بولاتىن.
ەسكە سالا كەتەيىك، بيىل قاراشا ايىندا ەلوردادا سيريا داعدارىسىن رەتتەۋگە باعىتتالعان استانا پروتسەسىنىڭ 22-كەزدەسۋى وتكەن بولاتىن. بۇل جيىنعا كەپىلگەر ەلدەر – رەسەي، تۇركيا جانە يران دەلەگاتسيالارى، سونداي-اق سيريا ۇكىمەتى مەن وپپوزيتسيا وكىلدەرى جانە باقىلاۋشىلار قاتىسقان ەدى.
كەلىسسوزدەر بارىسىندا سيرياداعى قاقتىعىستاردى توقتاتۋ، گۋمانيتارلىق كومەك كورسەتۋدى قامتاماسىز ەتۋ، ينفراقۇرىلىم نىساندارىن قالپىنا كەلتىرۋ، حالىقتى سۋ جانە جارىقپەن قامتاماسىز ەتۋ ماسەلەلەرى قاراستىرىلىپ، تاراپتار بەيبىت كەلىسىمگە كەلۋ ماقساتىندا پىكىر الماستى.
كەزدەسۋ قورىتىندىسى بويىنشا كەپىلگەر ەلدەر بىرلەسكەن مالىمدەمە جاساپ، سيريا داعدارىسىن شەشۋدە حالىقارالىق قۇقىق نورمالارىن ساقتاۋ جانە قاقتىعىستاردى تەك بەيبىت جولمەن رەتتەۋ قاجەتتىگىن اتاپ وتكەن. ەندىگى جاعدايدا استانا پروتسەسىنىڭ اياعى نە بولارى بەلگىسىز. بالكىم، اسادتىڭ بيلىكتەن كەتۋى بىرنەشە جىلدان بەرى ۇزبەي جۇرگىزىلىپ كەلە جاتقان كەلىسسوزدىڭ اقىرى بولار، بۇل تۋرالى ازىرگە ناقتى ايتىلمادى.
