“قازاق ءتىلى” قوعامىنا جاڭا باسشى تاعايىندالىپتى، قۇتتى بولسىن دەيمىز. ەندىگى ماسەلە باسشى اۋىسقاننان قوعام جاعدايى وڭالىپ كەتە مە؟ ءابدۋالي قايدار، ومىرزاق ايتبايۇلى سەكىلدى تاۋ تۇلعالار باسقارعان كەزدە بۇل قوعامىنىڭ ازۋى التى قارىس ەدى، ءتىل ءۇشىن تولاسسىز مايدانداسىپ، ءار ءسوز ءۇشىن ورەلى تالداۋ جاساپ، تەرميندەردىڭ اۋدارماسىن تالداپ تىنىم تاپپاي قىزمەت ەتتى. كابينەتتەرىنە بارساڭ تاۋ بولىپ ۇيىلگەن قاعازدان باستارىن ازەر كوتەرەتىن. ول كەزدە ۇيىمنىڭ وڭىرلەردەگى وكىلدەرى دە وتكىر بولاتىن.
سول ازاماتتاردىڭ ەسىل ەڭبەگى ەش بولىپ، مينيستر رايىمقۇلوۆانىڭ تۇسىندا وسىلان 3000-نان اسا تەرمين تاز قالپىنا تۇسكەندە : ء“انۇران” نەسىمەن جاقپادى، بيبليانى ەندى بيبليا دەيمىز دەگەنى قاي ساسقانى؟! - دەپ شىرقىراپ ەدىك. بۇل سالادا: ءتايت ارى! - دەپ ءتىل كوميتەتىن ىقتىرا الاتىن ءىرى تۇلعا قالماعانىنا قاراپ تۇڭىلدىك. قازىرگى قوعام - شالاجانسار.
اتى بار، ال اۋقىمدى شارا ۇيىمداستىرىپ الەۋەتىن كوتەرۋگە قولى قىسقا. جەر-جەردە ءبولىم اشىپ، وكىل سايلاعانىمەن ولاردىڭ جۇمىسىنا جەتى تيىن اقى تولەپ، شاراسىن قارجىلاندىرا المايدى. سودان بارىپ الدەبىر جيىنداردا ء“انابىر باسقارما الدە ءبولىم جانە “قازاق ءتىلى” قوعامىنىڭ ۇيىمداستىرۋىمەن” دەگەندەي قوسالقى بولىپ جۇرەدى. قوعامنىڭ ءتىرى ەكەنىن بىلدىرگىسى كەلەتىن بۇل امالدار ابىروي اكەلمەيدى. راۋان ءىنىمىز وسى ماسەلەلەردى شەشە السا، جاراعانى. جاس قوي، انا قوعامدى باسقارعان دەگەن اتاق ءۇشىن عانا كەلمەگەن بولار؟! پرەزيدەنت بۇل ۇيىم جايلى جىلى پىكىر ءبىلدىرىپ، جانساقتاۋ بولىمىنەن شىعارايىق دەگەندەي وي ايتقالى ءبىراز بولدى، “قازاق تىلىنە” باسقا ەمەس، سول كىسى سۇيەنگەندەر سەلسوق قاراپ وتىر.
بايقاساڭىزدار، “حالىقارالىق” دەمەدىم، قازاق ءتىلىنىڭ قازاقستانداعى جاعدايىن تۇزەپ الايىقشى، باسقا حالىقتاردىڭ اراسىن دا، كوزقاراسىن دا كەيىن بىلەرمىز…
