تۇركيانىڭ ءبىلىم ءمينيسترى يۋسۋف تەكين «تۇركيا عاسىرىنىڭ اعارتۋ مودەلى» اتتى جاڭا ءبىلىم بەرۋ باعدارلاماسى اياسىندا مەكتەپ وقۋلىقتارىنان بيلىك سىرتتان تاڭىلعان دەپ ەسەپتەيتىن بىرقاتار ۇعىمنىڭ الىنىپ تاستالعانىن مالىمدەدى، دەپ حابارلايدى «ادىرنا» ءتىلشىسى TRT-عا سىلتەمە جاساپ.
ەندى «كرەست جورىقتارى» «كرەست شابۋىلدارى» دەپ اتالادى، «گەوگرافيالىق جاڭالىقتار» — «وتارشىلدىقتىڭ باستاۋى»، ال «ورتالىق ازيا» — «تۇركىستان» دەپ وزگەرتىلگەن.
ىستامبۇلداعى چاملىدجا مەشىتى كونگرەسس ورتالىعىندا وتكەن ماراپاتتاۋ راسىمىندە ءسوز سويلەگەن تەكين «ەگەي تەڭىزى» اتاۋىنىڭ دا تاريحي تۇرعىدان دۇرىس ەمەستىگىن ايتتى.
«لوزاننا كەلىسىمىنە قول قويىلعان كەزدە ەشقانداي ەگەي تەڭىزى بولماعان. دۇرىس اتاۋى — ارالدار تەڭىزى. “ەگەي تەڭىزى” ۇعىمى ەكىنشى دۇنيەجۇزىلىك سوعىستان كەيىن، بەلگىلى ءبىر دەڭگەيدە گرەكيانىڭ قالاۋىمەن قولدانىسقا ەندى»، — دەدى مينيستر.
تەكيننىڭ ايتۋىنشا، مۇنداي تەرميندەر ازاماتتاردىڭ ۇلتتىق سانا-سەزىمىنە تىكەلەي اسەر ەتەدى.
«مۇنىڭ ءبارى ۇساق-تۇيەك سياقتى كورىنۋى مۇمكىن، بىراق ولار ۇلت رەتىندەگى سانامىزعا تىكەلەي ىقپال ەتەدى»، — دەدى ول.
مينيستر مەكتەپتەردە قانداي ءىس-شارالار وتكىزىلگەنىن دە ايتىپ ءوتتى. ونىڭ سوزىنشە، ءيزرايلدىڭ گازاداعى وككۋپاتسياسى باستالعان كەزدە وقۋ كۇنى ءبىر مينۋت ۇنسىزدىكپەن باستالعان.
«ساباقتى “چاناككالەدەن گازaعا دەيىن — وتاندى قورعاۋ” ۇرانىمەن باستادىق. ءبىز بەيبىتشىلىك پەن ادىلدىككە، ادام قۇقىقتارىن ساقتاۋعا ۇمتىلاتىنىمىزدى جانە وسىنى بالالارىمىزعا ۇيرەتەتىنىمىزدى جەتكىزگىمىز كەلدى»، — دەدى تەكين.
ءسوز سوڭىندا تەكين ۇلتتىق سانا-سەزىمدى السىرەتپەۋگە شاقىردى.
«يمپەريالىق دەرجاۆالار ءبىزدى ءجىتى باقىلاپ وتىر. ءبىزدىڭ ۇلتتىق رۋحىمىز ءاردايىم سەرگەك بولۋى كەرەك»، - دەيدى تۇرىك شەنەۋنىگى.
