استانادا حالىقارالىق «قازاق ءتىلى» قوعامىنىڭ جىلدىق قورىتىندى قۇرىلتايى ءوتتى.
قۇرىلتايعا قازاقستان پرەزيدەنتىنىڭ كومەكشىسى — پرەزيدەنتتىڭ ءباسپاسوز حاتشىسى رۋسلان جەلدىباي، پارلامەنت دەپۋتاتتارى، حالىقارالىق «قازاق ءتىلى» قوعامىنىڭ قۇرىلتايشىلارى مەن ورتالىق كەڭەس مۇشەلەرى، قور دەمەۋشىلەرى، وڭىرلىك فيليال توراعالارى جانە دەلەگاتتار قاتىستى.
جيىندا ۇيىمنىڭ جىل بويى اتقارىلعان جۇمىستارىنا ەسەپ بەرىلدى. سونداي-اق Endowment قورىنىڭ جەتەكشىسى سايلاندى. قۇرىلتايعا قاتىسقان قاۋىم ءبىراۋىزدان حالىقارالىق "قازاق ءتىلى" قوعامىنىڭ ۆيتسە-پرەزيدەنتى دۋلات تاستەكەيدىڭ كانديداتۋراسىن قولدادى.
ايتا كەتەيىك، 2023 جىلى قۇرىلعان Qazaq Tili Endowment قورى قوعامنىڭ ۇزاق مەرزىمدى تۇراقتىلىعىن قامتاماسىز ەتۋگە ىقپال ەتىپ كەلەدى. مەملەكەت باسشىسىنىڭ العاشقى قولداۋىنان كەيىن ءىرى كاسىپكەرلەر مەن كومپانيالار باستامانى جالعاستىرىپ، بۇگىنگى تاڭدا قورعا 700 ميلليون تەڭگەدەن اسا قاراجات جينالدى. قور قاراجاتى جۇمسالمايدى. بيىلعى ۇستەمە تابىس مولشەرى 80 ميلليون تەڭگەنى قۇراعان. بۇل قوعامنىڭ قارجىلىق دەربەستىگىن نىعايتۋعا مۇمكىندىك بەردى.
«قازاق ءتىلى» قوعامىنىڭ ەنداۋمەنت قورى 2023 جىلى مەملەكەتتىك ءتىلدى دامىتۋ مەن قولداۋ ماقساتىندا جۇيەلى جانە تۇراقتى جۇمىسقا قاجەت قارجىلىق نەگىز قالىپتاستىرۋ ءۇشىن قۇرىلعان.
ءبىرىنشى بولىپ بۇل باستامانى قازاقستان پرەزيدەنتى قاسىم-جومارت توقاەۆ قولداپ، 7 ملن تەڭگە كولەمىندە جارنا اۋدارعان ەدى. مەملەكەت باسشىسىنىڭ بۇل باستاماسىن بەلگىلى قازاقستاندىق كاسىپكەرلەر مەن قازاق ءتىلىنىڭ جاناشىرلارى جالعاستىردى.
بيىل ساۋىردە Lancaster Group اكتسيونەرلەرى — بەرىك قانيەۆ، گاۋحار قاپپاروۆا جانە يۋري پاك Qazaq Tili Endowment قورىنا 200 ملن تەڭگە بولسە، TAS Group قارجى كومپانياسى 100 ملن تەڭگە اۋدارعان بولاتىن.
