ورتالىق سايلاۋ كوميسسياسى پرەزيدەنتتىككە كانديداتتاردى رەسپۋبليكالىق قوعامدىق بىرلەستىكتەر ۇسىناتىنىن ايتتى
ورتالىق سايلاۋ كوميسسياسىنىڭ مۇشەسى زاۋرەش بايمولدينا ديپلوماتيالىق قىزمەتكە بايلانىستى قازىر قازاقستاندا تۇرمايتىن ەلشى يمانعالي تاسماعامبەتوۆ سايلاۋعا تۇسە الا ما دەگەن ساۋالعا جاۋاپ بەردى، دەپ حابارلايدى Sputnik قازاقستان تىلشىسى.
باق وكىلدەرى زاۋرەش بايمولدينادان قازاقستاننىڭ رەسەيدەگى ەلشىسى يمانعالي تاسماعامبەتوۆ كەزەكتەن تىس پرەزيدەنت سايلاۋىنا قاتىسا الا ما دەپ سۇرادى.
"ەگەر رەسپۋبليكالىق قوعامدىق بىرلەستىك ونىڭ كانديداتۋراسىن ۇسىنسا، قۇجاتتارىن قارايتىن بولامىز", - دەدى ول وسك وتىرىسىنان كەيىن.
ول كونستيتۋتسيا بويىنشا قازاقستاننىڭ ءار ازاماتى سايلاۋعا قاتىسۋعا نەمەسە داۋىس بەرۋگە قۇقىلى ەكەنىن اتاپ ءوتتى.
ەلشىلەردىڭ سايلاۋعا تۇسۋگە قۇقىعى بار ما دەگەن ساۋالعا بىلاي دەپ جاۋاپ بەردى.
"بىرىنشىدەن، ەلشى ساياسي مەملەكەتتىك قىزمەتشى بولىپ سانالادى. ەگەر ول كانديدات بارلىق تالاپقا سايكەس كەلسە، ياعني جاسى قىرىقتان اسقان، تۋمىسىنان قازاقستان ازاماتى، مەملەكەتتىك قىزمەتتە 5 جىلدان كەم ەمەس جۇمىس تاجىريبەسى بار، سوتتىلىعى جوق، جەمقورلىق قىلمىسىن جاساماعان، وسىنىڭ ءبارى ەسكەرىلەدى", - دەدى بايمولدينا.
وسك مۇشەسى بۇعان دەيىنگى پرەزيدەنت سايلاۋىندا ديپلوماتيالىق قىزمەتكەر بولعان عاني قاسىموۆتىڭ كانديدات بولعانىن اتاپ ءوتتى.
"كانديداتتىڭ قۇجاتتارىن كورمەي جاتىپ، ناقتى جاۋاپ بەرە المايمىن. ورتالىق سايلاۋ كوميسسياسى القالىق جيىندا ۇمىتكەردىڭ تالاپتارعا سايكەستىگىن قاراپ، شەشىم شىعارادى", - دەدى ول.