استانانىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى كەشە الماتى قالاسىنىڭ اكىمى، «نۇر وتان» (قازىرگى «امانات») پارتياسى توراعاسىنىڭ ءبىرىنشى ورىنباسارى قىزمەتىن اتقارعان باۋىرجان بايبەكتىڭ اكەسى قىدىرعالي بايبەككە قاتىستى ءىستى قارادى، - دەپ حابارلايدى "ادىرنا" پورتالى.
سوت اقبتك-ءنىڭ 319-بابى بويىنشا – جەر ۋچاسكەسىنە ءتيىستى قۇقىعىنسىز وندىرىستىك، تۇرعىن ءۇي، شارۋاشىلىق، گيدروتەحنيكالىق (سۋ) نەمەسە شارۋاشىلىق-تۇرمىستىق وبەكتىلەردى زاڭسىز سالۋ فاكتىسى بويىنشا ءىس قوزعادى.
«سوت كابينەتىندە» جاريالانعان سوت شەشىمىنە سايكەس، قىدىرعالي بايبەك استانالىق سكد بىرىندە تۇرعىن ەمەس ءۇي-جايعا كىرۋ ءۇشىن ەسىك ورناتقان. بۇل رەتتە ول قۇرىلىستى باقىلاۋدى جۇزەگە اسىراتىن ۋاكىلەتتى ورگانعا حابارلاماي، اكىمشىلىك كودەكستى بۇزعان.
«سوت وتىرىسىندا ق.م.بايبەك ءوز كىناسىن تولىق مويىندادى»، - دەلىنگەن سوت قاۋلىسىندا.
ايتا كەتەيىك، بۇعان دەيىن قىدىرعالي بايبەكتىڭ 51 750 تەڭگە ايىپپۇل ارقالاعانىن مالىمدەگەن بولاتىنبىز.
