دەپۋتات داۋلەت تۇرلىحانوۆ ءوز ۇلىنىڭ كەشەلى بەرگى جاعدايىن باياداپ، قازاقستاندىقتارعا ۇندەۋ جاسادى. ەل وزەكتى دەپ تاپقان ماسەلەنىڭ باسىن باسقا ارناعا بۇرۋ قاجەت ەكەنىن حابارلادى, دەپ جازادى "ادىرنا" ۇلتتىق پورتالى.
دەپۋتات ءوز ۇلىنا قاتىستى كەشە وربىگەن وقيعاعا پىكىر ءبىلدىرىپ، قازاقستاندىقتارعا ۇندەۋ تاستادى:
- قۇرمەتتى قازاقستاندىقتار! سوڭعى كەزدە مەنىڭ ۇلىما قاتىستى اقپارات كەڭىستىگىندە تاراپ جاتقان حابارلارعا بايلانىستى وزدەرىڭىزگە ۇندەۋىمدى جاريالاپ وتىرمىن. سوڭعى بەس ايدا الەۋمەتتىك جەلىلەردە ۇلىما قاتىستى جاعدايعا بايلانىستى وتە كوپ اقپارات شىعىپ جاتىر. يا، بۇل جاعدايدىڭ بولعانى راس، الايدا ونى قوعامدىق ورتاعا قايتا-قايتا سالا بەرۋدىڭ ءجونى جوق دەپ ەسەپتەيمىن. جاعداي ورىن العاندا، مەن ءوز پىكىرىمدى اشىق ايتقانمىن. بارلىق جاعداي زاڭ جۇزىندە شەشىلۋى كەرەك دەگەنمىن. قازىرگى كەزدە قوعامدىق ورتادا مەنىڭ ۇلىمنىڭ ءبىر قاتەلىگىنەن باسقا، قانشاما ايتىلاتىن وزەكتى ماسەلەلەر بار ەمەس پە؟! وسى ورايدا، ۇلىما بايلانىستى جاعدايدىڭ قوعامدا ۇلكەن اقپاراتقا اينالعانى تۇسىنىكسىز. جارايدى، اقپاراتتار شىعىپ جاتىر، وسى ارقىلى حايپ جيناپ، قوعامدا رەيتينگىن وسىرەمىن دەگەندەر ءوز ماقساتىنا جەتكەن شىعار. ەندى مەنىڭ ويىمشا بۇل ماسەلەنى وسى جەردەن دوعارعانىمىز دۇرىس، - دەدى دەپۋتات.سونىمەن قاتار، داۋلەت تۇرلىحانوۆ مۇنداي اقپاراتتار ۇلىنىڭ جۇيكە تالشىقتارىن تۇگەسىپ، جىگىتتىك شاعىندا ەڭسەسىن باساتىنىن جەتكىزدى:
- وسى اقپاراتتار مەنىڭ ۇلىما ۇلكەن پسيحولوگيالىق اۋىرتپالىق ءتۇسىرىپ جۇرگەنىن سەزەمىن. ول ءالى جاپ-جاس جىگىت. ونىڭ جاساعانى ديزەرتيرلىك ەمەس، بىلايشا ايتقاندا، بالالىققا سالىنىپ «ساموۆولكاعا» شىعىپ كەتكەنى. مەن ۇلىمنىڭ قازاقستان قارۋلى كۇشتەرىنىڭ ساپىندا جاۋىنگەر بولىپ جۇرگەنىن ماقتان ەتەمىن. ول جاستىقتىڭ جالىنىمەن قاتەلىك جاساعانى تۇسىنىكتى. عاشىق بولىپ جۇرگەن بالا، سۇيگەن قىزى كەلگەن ەكەن، سوعان شىعىپ كەتكەن. بۇل ەندى جاستىق سەزىم، ماحاببات سەزىمى. ارينە، مەن ونى اقتامايمىن. قاي اتا-انا ءوزىنىڭ بالاسىن جامان بولسىن دەيدى؟! وسى جاعدايعا بايلانىستى اقپاراتتاردان حاباردار بولىپ وتىرعان بالامنىڭ قازىرگى پسيحولوگيالىق جاعدايى مەنى قاتتى الاڭداتادى. قۇداي ساقتاسىن، وسى جاعداي بالامنىڭ تاعدىرىن تالكەككە سالىپ، قانداي دا ءبىر وقىس ارەكەتكە بارۋىنا سەبەپ بولسا، مەن دە ءوز تاراپىمنان قاراپ قالمايمىن، قولدانىستاعى زاڭ شەڭبەرىندە ارەكەت ەتەمىن، - دەپ جازدى دەپۋتات.دەپۋتاتتىڭ ايتۋىنشا، ۇلىن بۇلاي "توپەلەي بەرۋ" ونىڭ ابىرويىن ەشقانداي دا اقساتا المايدى.
- مەن ءومىرىمنىڭ باسىم بولىگىن ۇلكەن سپورتقا ارناعان اداممىن. ون جىل سسسر قۇراماسىندا كۇرەستىم، تاۋەلسىز قازاقستاننىڭ تۋىن تۇڭعىش رەت وليمپيادا ويىندارىندا كوتەرىپ شىقتىم. ءوزىم سپورتتى قويعاننان كەيىن، باپكەر رەتىندە ازيا، ازيا ويىندارى، الەم جانە وليمپيادا چەمپيوندارىن تاربيەلەپ شىعاردىم. مەن قازاقتىڭ ۇلى بولعانىما ماقتانامىن! قازاق ءۇشىن توگىلگەن قارا تەرىم مەن ولشەۋسىز ەڭبەگىمدى حالقىم باعالاعان، ءالى دە باعالاپ، قۇرمەتتەپ كەلەدى. بۇگىنگى كۇندەگى ابىرويىم - وراسان ەڭبەكتىڭ ارقاسىندا كەلگەن. ال مەنىڭ ۇلىممەن بولعان ءبىر عانا جاعداي – حالىق الدىنداعى ابىرويىمدى تۇسىرە المايدى. قوعامدى دۇرلىكتىرىپ، اقپارات تاراتىپ جۇرگەندەر وسىنى تۇسىنسە ەكەن دەيمىن. قۇرمەتتى دوستار! تاعى دا قايتالاپ ايتقىم كەلەدى، ۇلىما قاتىستى تەرگەۋ امالدارى جۇرگىزىلىپ جاتىر. ءبارى زاڭ شەڭبەرىندە شەشىلەتىن بولادى. تۇسىنىستىكپەن قاراۋلارىڭىزدى سۇرايمىن، - دەدى ول.ەستەرىڭىزگە سالا كەتەيىك، كەشە دەپۋتاتتىڭ ۇلىن قر قورعانىس مينيسترلىگىنىڭ وكىلدەرى ءبىر جوعالتىپ، ءبىر تاپقان ەدى. بۇعان دەيىن داۋلەت تۇرلىحانوۆتىڭ ۇلى اسكەري بولىمنەن قاشقانى تۋرالى حابارلانعان بولاتىن.
"ادىرنا" ۇلتتىق پورتالى
