ەلوردادا سايلاۋ ستراتەگيالارى تالقىلانىپ جاتقاندا، وڭىرلەردە ۆەتەريناريالىق ستانتسيالار، اياقكيىم فابريكالارى مەن تۇرمىستىق قالدىقتاردى سۇرىپتاۋ سياقتى كۇندەلىكتى ماسەلەلەرگە تولى ءومىر جالعاسۋدا. قۇرىلتاي دەپۋتاتتىعىنا كانديداتتاردىڭ قاي وڭىرلەرگە بارىپ، تۇرعىندارمەن قانداي تاقىرىپتاردى تالقىلاعانىنا شولۋ جاسايمىز.
«ادىلەت» پارتياسى ستۋدەنتتەرمەن، وقىتۋشىلارمەن، كاسىپكەرلەرمەن جانە كرەاتيۆتى يندۋستريا وكىلدەرىمەن تىكەلەي ديالوگ جۇرگىزۋ تاكتيكاسىن تاڭدادى. قوستاناي وبلىسىنىڭ بوروۆسكوە اۋىلىندا كانديدات ەدىل حامزا جەرگىلىكتى تۇرعىندارمەن كەزدەسىپ، ءوڭىر ءۇشىن وزەكتى ماسەلەلەردى تالقىلادى. ال باتىس قازاقستان وبلىسىندا تۇرعىندار، كاسىپكەرلەر، شىعارماشىلىق سالا وكىلدەرى، جاستار مەن ەڭبەك ۇجىمدارىمەن كەزدەسۋ ءوتتى. كەزدەسۋ بارىسىندا ءوڭىردىڭ الەۋمەتتىك-ەكونوميكالىق دامۋ ماسەلەلەرى قارالدى.
جالپىۇلتتىق سوتسيال-دەموكراتيالىق پارتيا (جسدپ) تۇرمىستىق قالدىقتاردى بولەك جيناۋ جانە قايتا وڭدەۋ ماسەلەلەرىن تالقىلادى. بۇل تاقىرىپتار اۋقىمدى ساياسي مالىمدەمەلەردەن گورى قاراپايىم كورىنگەنىمەن، ءاربىر تۇرعىننىڭ ومىرىنە تىكەلەي قاتىستى. تانىستىرىلىمعا ەكولوگتەر، مۇلىك يەلەرى بىرلەستىكتەرىنىڭ وكىلدەرى مەن قالا تۇرعىندارى قاتىستى. سونىمەن قاتار قۇرىلتاي دەپۋتاتتىعىنا كانديدات انارگۇل ابەنوۆا جەر ۇلەسى يەلەرىمەن كەزدەسىپ، جەر قاتىناستارىنا قاتىستى ماسەلەلەردى تالقىلادى.
«بايتاق» پارتياسى ءارتۇرلى وڭىرلەردە ەكولوگيالىق ۇيىمدار مەن كاسىپورىندار وكىلدەرىمەن بىرقاتار كەزدەسۋ وتكىزىپ، تابيعاتتى قورعاۋ سالاسىنىڭ ساراپشى ماماندارى قاتىسقان تالقىلاۋ ۇيىمداستىردى. كەزدەسۋلەردىڭ كۇن تارتىبىنە قاراعاندا، پارتيا قورشاعان ورتانى قورعاۋ ماسەلەسىن باستى نازاردا ۇستاپ وتىر.
قازاقستاننىڭ حالىق پارتياسى الەۋمەتتىك ساياسات ماسەلەلەرىن كۇن تارتىبىنە شىعاردى. استانادا كانديداتتار ءلاززات اقتاەۆا مەن نۇرجان بياقاەۆ قالالىق جەدەل مەديتسينالىق جاردەم ستانتسياسىنا بارىپ، دارىگەرلەر مەن فەلدشەرلەرمەن كادر تاپشىلىعى، ەڭبەك جاعدايى جانە شۇعىل مەديتسينالىق كومەكتى ۇيىمداستىرۋ ماسەلەسىن تالقىلادى. كەزدەسۋ بارىسىندا جەدەل جاردەم قىزمەتىنىڭ جۇمىسى، كادرلىق قامتاماسىز ەتۋ، مەديتسينا قىزمەتكەرلەرىنىڭ ەڭبەك جاعدايى جانە شۇعىل مەديتسينالىق كومەك كورسەتۋ جۇيەسى قامتىلدى.
«اۋىل» پارتياسىنىڭ وكىلدەرى پارتيا توراعاسى قايرات ايتۋعانوۆتىڭ باستاۋىمەن سولتۇستىك قازاقستان وبلىستىق ۆەتەريناريا باسقارماسىنىڭ ۇجىمىمەن كەزدەستى. كەزدەسۋ بارىسىندا ۆەتەريناريالىق قىزمەتتىڭ جۇمىسىنا قاتىستى ماسەلەلەر تالقىلانىپ، سالانىڭ قىزمەتىنە قاتىستى وزەكتى ماسەلە كوتەرىلدى.
«اق جول» دەموكراتيالىق پارتياسى ءوندىرىس ورىندارىن ارالاۋ باعىتىن تاڭدادى. تارازدا پارتيا توراعاسى دانيا ەسپاەۆا «تارازكوجوبۋۆ» كاسىپورنىنا بارىپ، جۇمىسشىلارمەن ءوندىرىس تسەحىندا جۇزدەستى. ال اتىراۋدا كانديدات ەرمەكقالي يۋسۋپوۆ ITC WEST لوگيستيكالىق ورتالىعىندا بولدى. ەڭبەك ۇجىمدارىمەن كەزدەسۋلەر جامبىل، اتىراۋ، ۇلىتاۋ وبلىستارىندا، قوستاناي مەن شىمكەنتتە دە ءوتتى. پارتيا وكىلدەرى ەلىمىزدىڭ وزگە وڭىرلەرىندە دە تۇرعىندارمەن جانە ەڭبەك ۇجىمدارىمەن كەزدەسۋلەرىن جالعاستىردى. سونىمەن قاتار «اق جول» كانديداتتارى Respublica پارتياسى وكىلدەرىنىڭ مالىمدەمەسىنە پىكىر ءبىلدىردى. ءماجىلىستىڭ بۇرىنعى دەپۋتاتى مەرۋەرت قازبەكوۆا ەكس-دەپۋتات ولجاس كوپبەكوۆتىڭ دەپۋتاتتىق ساۋالدارعا قاتىستى مالىمدەمەسىنە ءوز كوزقاراسىن ءبىلدىردى.
Respublica پارتياسى توراعاسىنىڭ ورىنباسارى جانات ىسقاقوۆ تمد حالىقارالىق بايقاۋشىلار ميسسياسىنىڭ وكىلدەرىمەن كەزدەستى. تاراپتار سايلاۋ ناۋقانىنا دايىندىقتى، سايلاۋالدى شتابتىڭ جۇمىسىن، ۇگىت-ناسيحات جۇرگىزۋ ەرەكشەلىكتەرىن، تسيفرلىق پلاتفورمالاردى پايدالانۋدى، سونداي-اق پارتيالىق ءتىزىمدى جاساۋ مەن كانديداتتاردى ىرىكتەۋ ماسەلەلەرىن تالقىلادى. حالىقارالىق بايقاۋشىلار ميسسياسىنىڭ وكىلدەرى ءوز كەزەگىندە جۇمىستىڭ قاعيداتتارى مەن ادىستەرى تۋرالى ايتىپ بەردى. تۇركىستاندا پارتيا باسشىلىعىنىڭ، قۇرىلتاي دەپۋتاتتىعىنا كانديداتتاردىڭ جانە پارتيا جاقتاستارىنىڭ قاتىسۋىمەن فورۋم ءوتتى. فورۋم بارىسىندا الەۋمەتتىك-ەكونوميكالىق كۇن ءتارتىبى، زاڭناما جانە وزگە دە ماسەلەلەر تالقىلانىپ، پارتيا وكىلدەرى قاتىسۋشىلاردىڭ سۇراعىنا جاۋاپ بەردى. سونىمەن قاتار Respublica پارتياسىنىڭ توراعاسى ايداربەك قوجانازاروۆ قازاقستاننىڭ حالىق پارتياسىنىڭ بۇرىنعى توراعاسى ەرمۇحامەت ەرتىسباەۆتىڭ مالىمدەمەسىنە پىكىر ءبىلدىرىپ، پارتيانىڭ بۇل ماسەلەگە قاتىستى بۇدان ارى جاريا پىكىرتالاسقا قاتىسپايتىنىن ايتتى.
وسىلايشا، پارتيالار وزدەرىنىڭ ءداستۇرلى باعىتتارى بويىنشا جۇمىسىن جالعاستىرىپ جاتىر. ءبىرى ەكولوگيا مەن الەۋمەتتىك سالا ماسەلەلەرىنە باسىمدىق بەرسە، ەندى ءبىرى ءوندىرىس ورىندارى مەن وڭىرلەردە حالىقپەن تىكەلەي ديالوگ ورناتۋعا نازار اۋداردى. سونىمەن قاتار سايلاۋ ناۋقانىنىڭ تاعى ءبىر قىرى – پارتيالاردىڭ ءبىر-ءبىرىن سىناۋى، قارسى تاراپتىڭ مالىمدەمەلەرىنە جاۋاپ بەرۋى جانە ءوز ۇستانىمدارىنىڭ ارا-جىگىن ايقىنداۋعا ۇمتىلىسى قاتار ءوربىپ جاتىر.
