ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولات پروباتسيالىق باقىلاۋدى بۇزدى دەپ ايىپتالدى، دەپ حابارلايدى "ادىرنا" ۇلتتىق پورتالى.
ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولات ەرلى-زايىپتى زاڭگەرلەر چەرنوۆتارعا شابۋىل جاساعانى ءۇشىن 2 جىلعا باس بوستاندىعىن شەكتەۋ جازاسىنا كەسىلگەن بولاتىن. الايدا، كەشە 13 تامىز كۇنى تاراعان ۆيدەودا ونىڭ تالاپتى ورىنداماي جۇرگەنى بايقالادى. نۇراسىل بولات تۇندە كوشەدە تەمەكى شەگىپ تۇر جانە ۆيدەو اۆتورىنىڭ سوزىنە جاۋاپ قاتپايدى.
“ۆيدەو شامامەن تۇنگى ساعات 3-تە جاريالاندى، ال ول كەشكى 23.00-دەن كەيىن ۇيدە بولۋى كەرەك. ونىڭ ۇستىنە ونىڭ تىركەلگەن جەرى – استانا، بىراق ۆيدەو تۇندە الماتىدا تۇسىرىلگەن. بۇل جەردە بىرنەشە قۇقىقبۇزۋشىلىق ورىن الىپ وتىر”، – دەپ مالىمدەدى ادۆوكات اننا چەرنوۆا.
جابىرلەنۋشى كىنالى ادامنىڭ جازاسىن دۇرىس وتەمەي جۇرگەنىنە نارازى.
ايتا كەتسەك، اقپان ايىندا زاڭگەر اننا ديميتريەۆيچ پەن كۇيەۋى ولەگ چەرنوۆ ەكەۋىن داۋلەت تۇرلىحانوۆتىڭ ۇلى نۇراسىل سوققىعا جىققان بولاتىن. كوپ ۇزاماي ونىڭ ۇستىنەن قر قك-نىڭ 293-بابى “بۇزاقىلىق” بويىنشا قىلمىستىق ءىس قوزعالعان ەدى. العاشىندا دەپۋتاتتىڭ ۇلى ايىپپۇلمەن قۇتىلعانىمەن، كەيىن جوعارعى سوت وعان باس بوستاندىعىن شەكتەۋ جازاسىن بەرگەن بولاتىن.
