8 ساۋىردە وتكەن قوعامدىق كەڭەس وتىرىسىندا الماتى اكىمى باۋىرجان بايبەك "ساراپشىلار پىكىرىن قاراپ، جاڭا ورىن ىزدەپ، جوبانى دامىتا ءتۇسۋ ءۇشىن" "كوكجايلاۋ" كۋرورتىنىڭ قۇرىلىسىن كەيىنگە شەگەرۋدى ۇسىندى. بۇل تۋرالى قازاقستاندىق باق جازدى.
"اسىعۋدىڭ قاجەتى جوق دەپ ويلايمىن. ساراپشىلار پىكىرىنىڭ ءبارىن ەسكەرىپ، جاڭا ورىندار قاراستىرۋىمىز كەرەك. ["كوكجايلاۋ"] جوباسىن دامىتىپ، كەيىنگە قالدىرۋدى ۇسىنامىن. ونىڭ ۇستىنە، مامانداردىڭ پىكىرىنشە، ەندىگى بار كۋرورتتاردى دامىتۋعا از دەگەندە ءۇش-بەس جىل كەرەك. وسى ۋاقىت ىشىندە تاجىريبە جيناپ، مامان دايىنداپ، تۇرعىندار مەن كۋرورت قوناقتارىنىڭ پىكىرىن زەردەلەيمىز. وسىندان سوڭ عانا "كوكجايلاۋ" تاۋ شاڭعى كۋرورتىنىڭ قۇرىلىسىنا كىرىسە الامىز" دەيدى باۋىرجان بايبەك.
بيىل كۇزدە الماتى قالاسى اكىمدىگى باستاپقى جوبانى قايتا قاراپ, ىقتيمال قۇرىلىس اۋماعىن 14 ەسە قىسقارتقان. بىراق قوعام وكىلدەرى بيلىك جوسپارىمەن ءالى دە كەلىسپەيدى. ولاردىڭ ايتۋىنشا، قوناقۇي، كافە، ينفراقۇرىلىم نىساندارىن سالۋ تاۋدىڭ ەكولوگيالىق جۇيەسىنە ۇلكەن زيان كەلتىرمەك.
وقي وتىرىڭىز: كوكجايلاۋدى قورعاۋعا ارنالعان Kوk-Jaılıaý basqosý شاراسى باستالدى
الماتىعا جاقىن "مەدەۋ" مۇز ايدىنىنان ءتورت كيلومەتر قاشىقتىقتا ورنالاسقان شاتقالعا كۋرورت سالۋ جوباسى 2002 جىلى كوتەرىلگەن. الماتى بيلىگى ونىڭ تاۋ ەكوجۇيەسىنە زيان كەلتىرمەيتىنىن ايتادى. قالالىق اكىمدىكتىڭ پىكىرىنشە، جوبا ءتۋريزمدى دامىتۋ ءۇشىن وتە ماڭىزدى.
كوكجايلاۋعا كۋرورت سالۋعا قارسى قوعامدىق ەكولوگتاردىڭ شاعىمى بويىنشا سوتتا بەس ءىس قارالدى. پروكۋراتۋراعا جيىرمادان استام ارىز ءتۇستى.
2017 جىلى ورحۋس كونۆەنتسياسىن ساقتاۋ ماسەلەلەرى جونىندەگى كوميتەت قازاقستاننىڭ جوبانى تالقىلاۋعا قوعام وكىلدەرىن قاتىستىرۋ ىسىندە كونۆەنتسيا تالاپتارى مەن جەرگىلىكتى زاڭنامانى ساقتاماعان دەپ تاپقان.
"ازاتتىق" راديوسى
