8 sáýirde ótken qoǵamdyq keńes otyrysynda Almaty ákimi Baýyrjan Baıbek "sarapshylar pikirin qarap, jańa oryn izdep, jobany damyta túsý úshin" "Kókjaılaý" kýrortynyń qurylysyn keıinge shegerýdi usyndy. Bul týraly qazaqstandyq BAQ jazdy.
"Asyǵýdyń qajeti joq dep oılaımyn. Sarapshylar pikiriniń bárin eskerip, jańa oryndar qarastyrýymyz kerek. ["Kókjaılaý"] jobasyn damytyp, keıinge qaldyrýdy usynamyn. Onyń ústine, mamandardyń pikirinshe, endigi bar kýrorttardy damytýǵa az degende úsh-bes jyl kerek. Osy ýaqyt ishinde tájirıbe jınap, maman daıyndap, turǵyndar men kýrort qonaqtarynyń pikirin zerdeleımiz. Osyndan soń ǵana "Kókjaılaý" taý shańǵy kýrortynyń qurylysyna kirise alamyz" deıdi Baýyrjan Baıbek.
Bıyl kúzde Almaty qalasy ákimdigi bastapqy jobany qaıta qarap, yqtımal qurylys aýmaǵyn 14 ese qysqartqan. Biraq qoǵam ókilderi bılik josparymen áli de kelispeıdi. Olardyń aıtýynsha, qonaqúı, kafe, ınfraqurylym nysandaryn salý taýdyń ekologııalyq júıesine úlken zııan keltirmek.
Oqı otyryńyz: Kókjaılaýdy qorǵaýǵa arnalǵan Kok-Jaılıaý basqosý sharasy bastaldy
Almatyǵa jaqyn "Medeý" muz aıdynynan tórt kılometr qashyqtyqta ornalasqan shatqalǵa kýrort salý jobasy 2002 jyly kóterilgen. Almaty bıligi onyń taý ekojúıesine zııan keltirmeıtinin aıtady. Qalalyq ákimdiktiń pikirinshe, joba týrızmdi damytý úshin óte mańyzdy.
Kókjaılaýǵa kýrort salýǵa qarsy qoǵamdyq ekologtardyń shaǵymy boıynsha sotta bes is qaraldy. Prokýratýraǵa jıyrmadan astam aryz tústi.
2017 jyly Orhýs konvenııasyn saqtaý máseleleri jónindegi komıtet Qazaqstannyń jobany talqylaýǵa qoǵam ókilderin qatystyrý isinde Konvenııa talaptary men jergilikti zańnamany saqtamaǵan dep tapqan.
"Azattyq" radıosy
