بۇرىنعى مادەنيەت جانە سپورت ءمينيسترى ارىستانبەك مۇحامەديۇلىنىڭ ادۆوكاتى قامالعانى جانە جۇبايىنىڭ كۇدىككە ىلىنگەنى رەسمي تۇردە جاريالاندى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى ءمالىم ەتتى، دەپ حابارلايدى "ادىرنا" ۇلتتىق پورتالى.
«جاسىرىن ءىس-شارالار كەشەنىنىڭ ناتيجەلەرى بويىنشا پارا بەرۋگە وقتالعان مادەنيەت جانە سپورت ەكس-ءمينيسترى ا.مۇحامەديۇلىنىڭ جۇبايى اشكەرەلەندى. Cونداي-اق، اتالعانداردىڭ مۇددەلەرىن قورعاۋدى جۇزەگە اسىرعان ادۆوكات الاياقتىق پەن پارا بەرۋگە يتەرمەلەۋ كۇدىگىمەن ۇستالدى. ا.مۇحامەديۇلىنىڭ قىلمىستىق جازاسىن جەڭىلدەتۋ جانە قاماۋدان بوساتۋ جەلەۋىمەن قورعالۋشىنىڭ جۇبايىنان سوت ورگاندارىنىڭ لاۋازىمدى ادامدارىنا بەرۋ ءۇشىن پارا رەتىندە 460 000 اقش دوللارى سوماسىندا اقشالاي قاراجات العان. تەرگەۋ امالدارى بارىسىندا 255 000 اقش دوللارى كولەمىندەگى قاراجات انىقتالىپ، تاركىلەندى. قالعان سومانى ول ءوز قالاۋى بويىنشا جۇمساعانى انىقتالدى»، – دەلىنگەن ءباسپاسوز حابارلاماسىندا.
ءمالىم ەتىلگەندەي، ا.مۇحامەديۇلىنىڭ ادۆوكاتى قاماۋعا الىنسا، ايەلى پارا بەرۋدە كۇدىكتى رەتىندە تانىلىپ وتىر.
«ەكس-ءمينيستردىڭ وكىلى ۇستالىپ، ۋاقىتشا ۇستاۋ يزولياتورىنا قامالدى. مۇحامەديۇلىنىڭ جۇبايى اسا ءىرى كولەمدە پارا بەرۋگە وقتالۋى بويىنشا كۇدىكتى بولىپ تانىلدى. قر قپك 201-بابىنا سايكەس، تەرگەۋ مۇددەسىنە وراي وزگە اقپارات جاريالاۋعا جاتپايدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىقبۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى. سىبايلاس جەمقورلىققا قارسى قىزمەت مەملەكەتتىك ورگانداردىڭ قىزمەتىنە بايلانىستى قانداي دا ءبىر ماسەلەنى شەشۋ سىلتاۋىمەن الاياقتىقتىڭ، ونىڭ ىشىندە پارا بەرۋگە يتەرمەلەۋگە الىپ كەلەتىن الاياقتىقتىڭ جالعاسىپ جاتقان جاعدايلارىنا باسا نازار اۋدارادى. وسىنداي جاعدايلاردا سىبايلاس جەمقورلىققا قارسى قىزمەتكە حابارلاسۋدى نەمەسە وسىنداي فاكتىلەر تۋرالى 1424 ءنومىرى بويىنشا Call-ورتالىققا حابارلاۋدى سۇرايمىز»، – دەلىنگەن اگەنتتىك دەرەگىندە.
ەسكە سالا كەتەيىك، ۇلتتىق مۋزەيدىڭ بۇرىنعى ديرەكتورى، بۇرىنعى مادەنيەت جانە سپورت ءمينيسترى ارىستانبەك مۇحامەديۇلىنىڭ ۇستىنەن قوزعالعان قىلمىستىق ءىس بويىنشا سوت ۇكىمى شىقتى. بۇرىنعى مينيستر سەگىز جىلعا سوتتالعان ەدى.
"ادىرنا" ۇلتتىق پورتالى
