Ұлттық музейдің бұрынғы директоры, бұрынғы Мәдениет және спорт министрі Арыстанбек Мұхамедиұлының үстінен қозғалған қылмыстық іс бойынша сот үкімі шықты. Бұрынғы министр сегіз жылға сотталды, деп хабарлайды "Адырна" ұлттық порталы.
Астана қаласының № 2 Байқоңыр аудандық сотының судьясы Бағлан Ыдырысов бұрынғы мәдениет министрі Арыстанбек Мұхамедиұлына және басқа да қылмысқа қатысы бар деп танылған тұлғаларға қатысты үкім шығарды.
"Арыстанбек Мұхамедиұлы ҚР Қылмыстық кодекстің 28-бабы 3-бөлігі және 189-бөлігі 4-тармағы 2-тармағы бойынша құқық бұзушылық жасағаны үшін кінәлі деп танылсын. 8 жылға бас бостандығынан айыру жазасы тағайындалсын", - деді судья Бағлан Ыдырысов.
Сондай-ақ, сот Мұхамедиұлын мемлекеттік наградалардан айыру туралы қаулы шығарды.
Сот шешімімен Арыстанбек Мұхамедиұлы мемлекеттік қызметте, жергілікті өзін-өзі басқару органдарында қызмет атқару құқығынан өмір бойы айырылды.
Орайы келгенде айта кетейік, прокурор Арыстанбек Мұхамедиұлын 9 жылға бас бостандығынан айыруды сұраған еді.
Естеріңізде болса, 2022 жылдың 28 мамырында сот шешімімен Ұлттық музей директоры болған Арыстанбек Мұхамедиұлы қамауға алынды.
Тергеу "Алтын адамның әлем мұражайлары бойынша шеруі" халықаралық көрмесін өткізуге, сондай-ақ "Қазақстанның ұлттық киелі нысандары мен музей қорларын жалпымемлекеттік фотограмметриялық 3D-сканерлеу" және "Қазақстан Республикасының Ұлттық цифрлық киноколлекциясын цифрландыру" жобаларына бөлінген бюджет қаражатын ұрлау фактілері бойынша жүргізілді.
Бұрынғы министрдің сот отырысында айтқан "ақырғы сөзі" қалың көпшілікке жетті. Жылдар жетегінде басшылық мінберінен түспеген Мұхамедиұлы:
– Құрметті сот! Мен кез келген жазаға келісемін, тіпті атып тастаса да мейлі – бірақ тек ақша жымқырды деген айып емес. Қазақтың керемет мақалы бар. "Өлімнен ұят күшті". Мен 60 жыл лайықты өмір сүрдім, – деген еді.
Әлеуметтік желіде Арыстанбек Мұхамедиұлын айдауылдар әкетіп бара жатқанын көрсететін видео тарады. Онда бұрынғы министрдің туысқандары сот отырысында сойқан ұйымдастырып, үкіммен келіспегендерін білдіргені байқалады.
Жинақтай айтқанда, тергеу бір жылға созылды. Тергеу мәліметінше, біраз жыл мәдениет және спорт министрлігін басқарған Мұхамедиұлы мен оның сыбайластарының мемлекетке келтірген шығыны шамамен 221 миллион теңгеден асады.
"Адырна" ұлттық порталы
