سىبايلاس جەمقورلىققا قارسى ءىس-قيمىل اگەنتتىگى ارىستانبەك مۇحامەديۇلىنىڭ ءىسىن ءالى تەرگەپ جاتىر. بۇل تۋرالى سىبايلاس جەمقورلىققا قارسى قىزمەت مالىمدەدى، دەپ حابارلايدى “ادىرنا” ۇلتتىق پورتالى.
انتيكور ۇلتتىق مۋزەيدىڭ ديرەكتورى ا.مۇحامەديۇلى مەن باسقا دا تۇلعالارعا قاتىستى بيۋدجەت قاراجاتىن اسا ءىرى مولشەردە ۇرلاۋ جانە لاۋازىمدىق وكىلەتتىكتەردى تەرىس پايدالانۋ فاكتىلەرى بويىنشا تەرگەۋدى جالعاستىرۋدا.
“تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي-اق «قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D-سكانەرلەۋ» جانە «قازاقستان رەسپۋبليكاسىنىڭ ۇلتتىق تسيفرلىق كينوكوللەكتسياسىن تسيفرلاندىرۋ» جوبالارىنا بولىنگەن بيۋدجەت قاراجاتىن ۇرلاۋ فاكتىلەرى بويىنشا جۇرگىزىلىپ جاتىر”، - دەپ جازىلعان حابارلامادا.
سونداي-اق ارىستانبەك مۇحامەديۇلىنىڭ مادەنيەت جانە سپورت ءمينيسترى بولعاندا تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» رمقك، «قازاق ەنتسيكلوپەدياسى» اق جانە «قازاق عىلىمي-زەرتتەۋ مادەنيەت ينستيتۋتى» جشس زاڭسىز بەرۋگە قاتىستىلىعى تەكسەرىلۋدە.
تەرگەلىپ جاتقان قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ملرد تەڭگەنى قۇرايدى.
ارىستابەك مۇحامەديۇلىنىڭ قاماۋدا ۇستاۋ مەرزىمى 4 ايعا دەيىن ۇزارتىلدى.
”ادىرنا” ۇلتتىق پورتالى
