ەكىباستۇزدا سوتتالعان ازامات قاتاڭ رەجيمدەگى كولونياعا ءتۇسۋ ءۇشىن تۇرمەدەن قاشقان، بەپ حابارلايدى “ادىرنا” ءتىلشىسى Sputnik.kz-كە سىلتەپ.
ەكىباستۇزدا تۇرمەدەن قاشقان ازامات ەكى كۇن ىشىندە پاۆلودار، استانا قالالارىنا بارىپ، كەيىن ورالىپ، ءوز ەركىمەن پروكۋراتۋراعا بارعان.
شىدەرتى كەنتىندەگى تۇزەۋ مەكەمەسى قازان ايىندا كەنشىلەر قالاسىنا كوشىرىلمەك بولعان. ويتكەنى مەكەمە عيماراتىنىڭ توزىعى جەتكەن. الايدا تۇزەۋ مەكەمەسىن بۇرىڭعى تۋبديسپانسەر عيماراتىنا اۋىستىرۋ ءبىر سوتتالۋشىنىڭ قاشىپ كەتۋىنە سەبەپ بولىپ وتىر.
37 جاستاعى جازاسىن وتەۋشى 21 قازاندا قونىس كولونياسىنان ادەتتەگىدەي جۇمىسىنا كەتىپ، قايتا ورالماعانى انىقتالعان. ول ەكى كۇندە پاۆلودار، استانا قالالارىنا بارىپ، كەيىن قايتا ورالعان.
سوتتالعان قاشقىن قاتاڭ رەجيمدەگى كولونياعا ءتۇسۋ ءۇشىن ادەيى قاشقانىن مويىنداعان.
قىلمىستىق قۇقىق بۇزۋشىلىق جاساردان 2-3 كۇن بۇرىن مەكەمە اكىمشىلىگى قونىس كولونياسىنداعى سوتتالعاندارعا تۋبديسپانسەر عيماراتىنا كوشكەنى تۋرالى حابارلاعان. سوتتالۋشى باسشىلاردان بۇل عيماراتتىڭ ومىرلەرىنە قانشالىقتى قاۋىپسىز ەكەنىن سۇراعان. الايدا مەكەمە باسشىلىعى ماردىمدى جاۋاپ بەرە الماعان. دەنساۋلىعىنا الاڭداعان سوتتالۋشى قاتاڭ تارتىپتەگى تۇزەۋ مەكەمەسىنە ءتۇسۋ ءۇشىن ادەيى قاشقان، - دەلىنگەن ەكىباستۇز قالالىق سوتىنىڭ ۇكىمىندە.
قاشقىنعا قاتىستى قىلمىستىق ءىس "جازانى وتەۋدەن جالتارۋ" بابى بويىنشا قارالىپ، بارىنشا قاۋىپسىزدىگى جوعارى كولونيادا ءبىر جىلعا باس بوستاندىعىنان ايىرۋ جازاسى تاعايىندالىپ وتىر.
