اقتوبەدە تانىمال دارىگەر اباي ايساعاليەۆتى ءولتىرىپ، دەنەسىن مۇزداتقىشقا تىعىپ قويعان مەيىرگەرگە قاتىستى سوت ۇكىمى شىقتى، دەپ حابارلايدى «ادىرنا» ءتىلشىسى.
ءىستى بۇگىن، 22 قازاندا اقتوبە وبلىسى قىلمىستىق ىستەر جونىندەگى مامانداندىرىلعان اۋدانارالىق سوت قارادى.
«قىلمىستىق كودەكستىڭ 99-بابى 2-بولىگى 8-تارماعى بويىنشا 16 جىل، 188-بابى 3-بولىگى 1-تارماعى بويىنشا 4 جىل 8 اي، تۇپكىلىكتى 20 جىل باس بوستاندىعىنان ايىرۋ جازاسى تاعايىندالسىن. اباي ايساعاليەۆتىڭ اتىنان بەرىلگەن ازاماتتىق تالاپ ارىز ءىشىنارا قاناعاتتاندىرىلسىن. سوتتالۋشى نۇرسۇلتان شايمەردەنوۆتەن 2 837 321 تەڭگە، زاڭدى وكىلىنىڭ شىعىنى رەتىندە 3 ملن تەڭگە، مورالدىق شىعىن 10 ميلليون تەڭگە ءوندىرىلسىن. زاتتاي ايعاقتار ايساعاليەۆتىڭ يەلىگىنە بەرىلسىن. 4 480 050 تەڭگە، 50 ەۋرو ايساعاليەۆكە، سونىمەن بىرگە ساعات، التىن بۇيىمدار ايساعاليەۆكە بەرىلسىن»،— دەدى سۋديا جانىبەك سەيىتجاپاروۆ.
ءىس القا بيلەردىڭ قاتىسۋىمەن قارالدى. ۇكىمدى تىڭداۋعا مارقۇمنىڭ جاقىندارى دا كەلدى. ال سوتتالۋشىنىڭ جاعىنان ەشكىم قاتىسپادى.
ەسكە سالايىق، قىلمىستىق وقيعا 24 مامىر كۇنى بولعان ەدى. ايىپتالۋشى دارىگەردى بىرنەشە رەت پىشاقتاپ، بالتامەن ۇرعان. كەيىن ءمايىتىن توڭازىتقىشقا تىعىپ قويعان. سوت مالىمەتىنشە، ەر ادام الدىن-الا ساتىپ العان ماسكانى كيىپ، دارىگەردىڭ ەسەپ شوتىنان 5 ملن تەڭگە، ۇيىنەن 1,9 ملن تەڭگەگە تەڭ باعالى زاتتارىن توناپ كەتكەن.
