بەلگىلى قازاقستاندىق جۋرناليست ميحايل كوزاچكوۆ ەكس-مادەنيەت جانە سپورت ءمينيسترى ارىستانبەك مۇحامەديۇلىنىڭ مۇددەسىن قورعاعان ادۆوكات مۇستاحيم تولەەۆتىڭ ۇستالعانى تۋرالى مالىمدەدى، دەپ حابارلايدى “ادىرنا” ۇلتتىق پورتالى.
استانادا بۇرىنعى مادەنيەت ءمينيسترى ارىستانبەك مۇحامەديۇلىن قورعاعان ادۆوكات مۇستاحيم تولەەۆ ۇستالدى. الدىن الا بولجام بويىنشا، ادۆوكاتتىق ءوتىنىشتى ەكس-شەنەۋنىكتىڭ ايەلى جازعان. ول كۇيەۋىنە جەڭىل جازا تاعايىنداۋ ءۇشىن ادۆوكاتقا ءبىراز اقشا بەردىم دەپ وتىر، - دەلىنگەن حابارلامادا.
ءجۋرناليستىڭ ايتۋىنشا، قىلمىستىق ءىس «الاياقتىق» جانە «پارا بەرۋگە يتەرمەلەۋ» باپتارى بويىنشا تىركەلگەن.
ادۆوكات تولەەۆ يزولياتورعا قامالدى.
ەسكە سالايىق، 2022 جىلدىڭ 16 مامىرىندا مۇحامەديۇلىنىڭ ۇيىندە جانە ۇلتتىق مۋزەيدە ءتىنتۋ جۇمىستارى جۇرگىزىلىپ جاتقانى بەلگىلى بولدى. كەيىنىرەك ەكس-مينيستر ءوز-وزىنە قول جۇمسادى دەگەن اقپارات تارادى.
الايدا ونىڭ وكىلدەرى بۇل اقپاراتتى جوققا شىعاردى. كەيىن مۇحامەديۇلىنىڭ ءوزىنىڭ الەۋمەتتىك جەلىدەگى پاراقشاسىندا پرەزيدەنت قاسىم-جومارت توقاەۆتىڭ اتىنا ۇندەۋى پايدا بولدى. وندا ەكس-مينيستر سىبايلاس جەمقورلىققا قارسى تەرگەۋدىڭ باستالعانىن راستاپ، ونى بەلگىلى اكتەر تۇڭعىشباي جامانقۇلوۆپەن اراسىنداعى كەلىسپەۋشىلىكتەرمەن بايلانىستىردى. كەيىن جامانقۇلوۆ مۇحامەديۇلىنىڭ ۇستىنەن ارىز جازعاننىڭ ءوزى ەكەنىن راستادى. سول كۇنى سىبايلاس جەمقورلىققا قارسى قىزمەت ۇلتتىق مۋزەيدىڭ شەنەۋنىكتەرىنە 146 ميلليون تەڭگە جىمقىردى دەگەن ايىپ تاعىلعانىن حابارلادى.
1 شىلدەدە مۇحامەديۇلى الماتى قالاسىنداعى «رەسپۋبليكالىق سۋ جانە قولدانبالى سپورت تۇرلەرىنەن جوعارى سپورت شەبەرلىگى مەكتەبى» مەملەكەتتىك كاسىپورنىنىڭ ۆەدومستۆولىق باعىنىستاعى عيماراتىن ەنشىلەس ۇيىمنىڭ پايداسىنا جەڭىلدەتىلگەن باعامەن يەلىكتەن شىعارۋعا كومەكتەسكەنى بەلگىلى بولدى. وسى ەپيزود جانە كەيبىر دەرەكتەر بويىنشا، 2,218 ملرد تەڭگە كولەمىندە شىعىن كەلتىرىلگەن.
24 قاڭتاردا مۇحامەديۇلى ىسىنە قاتىستى قر ۇلتتىق مۋزەيى ديرەكتورىنىڭ ەكس-ورىنباسارى الماز نۇرازحاننىڭ ۇستالعانى بەلگىلى بولدى.
20 ماۋسىمدا مۇحامەديۇلى سەگىز جىلعا باس بوستاندىعىنان ايىرىلدى.
