قازاقستاندىق تانىمال ءانشى قايرات نۇرتاس بۇزاقىلىق بابى بويىنشا قوزعالعان قىلمىستىق ءىس بويىنشا ايىپتالۋشى بولىپ، 5 جىلعا باس بوستاندىعىنان ايىرىلۋى مۇمكىن. بۇل تۋرالى جۋرناليست ميحايل كوزاچكوۆ ءوزىنىڭ telegram-ارناسىندا جازدى، دەپ حابارلايدى “ادىرنا” ۇلتتىق پورتالى..
«تانىمال ءانشى الماتىدان استاناعا ۇشقان ۇشاق بورتىندا جانجال شىعارىپ، سالدارىنان جولاۋشى اسىلبەك بەكقايىروۆ زارداپ شەكتى. ۇشاق كومانديرى پوليتسيا شاقىرىپ، توبەلەسكە قاتىسقان ەكى ازامات تە پوليتسيا بولىمشەسىنە جەتكىزىلدى. نۇرتاسقا قاساقانا جەڭىل زيان كەلتىرۋ جانە بىرنەشە رەت ۇساق بۇزاقىلىق جاساعانى ءۇشىن حاتتاما تولتىرىلدى» دەلىنگەن حابارلامادا.
ءجۋرناليستتىڭ ايتۋىنشا، انشىگە قاتىستى قاتال جازا قولدانىلۋى مۇمكىن.
«نۇرتاسقا قاتىستى قىلمىستىق كودەكستىڭ 293-بابىنىڭ 2-بولىگى - «اۋە كەمەسىنىڭ بورتىندا جاسالعان بۇزاقىلىق» بويىنشا سوتقا دەيىنگى تەرگەۋ باستالدى. باپتىڭ سانكتسياسىندا ايىپپۇل، قوعامدىق جۇمىستارعا تارتۋ، باس بوستاندىعىن شەكتەۋ نەمەسە 5 جىلعا دەيىن باس بوستاندىعىنان ايىرۋ قاراستىرىلعان» دەلىنگەن حابارلامادا.
قايرات نۇرتاس تۇندە شىمكەنتتە ۇستالدى. كولىكتەگى پوليتسيا دەپارتامەنتى انشىگە قاتىستى «الماتى-استانا» رەيسىنىڭ بورتىندا ۇساق بۇزاقىلىق جاساپ، قاساقانا دەنساۋلىققا جەڭىل زيان كەلتىرگەنى ءۇشىن اكىمشىلىك ءىس قوزعالعانىن حابارلادى. ماتەريالدار قاراۋ ءۇشىن سوتقا جىبەرىلدى.
ايتا كەتەيىك، بۇعان دەيىن ازىلكەش تۇرسىنبەك قاباتوۆتىڭ دا قامالعانىن حابارلادىق.
