Reseıde "Vagner" jeke áskerı kompanııasynyń basshysy Evgenıı Prıgojın men Reseı qorǵanys mınıstri Sergeı Shoıgý arasyndaǵy qaqtyǵys aıasynda Reseıdegi áskerı-saıası jaǵdaı kúrt nasharlady, dep habarlaıdy “Adyrna” ulttyq portaly.
23 maýsym kúni keshke Prıgojın Shoıgýdy Ýkraınaǵa qarsy soǵys qımyldaryna qatysqan jeke áskerı kompanııanyń tylyna shabýyl jasady dep aıyptady. Prıgojınniń málimdemesinen keıin federaldy qaýipsizdik qyzmeti qarýly tóńkeris týraly qylmystyq is qozǵady. Reseıdiń birqatar oblystarynda qaýipsizdik sharalary kúsheıtildi.
Evgenıı Prıgojın Reseıdiń qorǵanys mınıstrligi "Vagner" áskerine soqqy jasaǵanyn málimdegen. Al VVS qyzmetiniń málimetinshe Prıgojın men qorǵanys mınıstrligi arasyndaǵy daý shegine jetken. "Vagnerge" jasalǵan soqqydan keıin Prıgojın "ádildik marshyn" ótkizýge ýáde berdi. Muny kópshiligi áskerı tóńkeris dep baǵalady.
Alaıda, Reseı bıligi soqqy jasalǵany týraly aqparattyń shyndyqqa janaspaıtynyn málimdedi.
Reseı federaldy qaýipsizdik qyzmetiniń tergeý basqarmasy 2023 jyldyń 23 maýsymynda Evgenıı Prıgojınge qatysty qarýly tóńkeris deregi boıynsha Qylmystyq kodekstiń 279-babymen is qozǵady. Onyń is-áreketine laıyqty quqyqtyq baǵa beriledi. Bul qylmys úshin 12 jyldan 20 jylǵa deıin bas bostandyǵynan aıyrý jazasy qarastyrylǵan, – delingen Reseıdiń bas prokýratýrasynyń málimdemesinde.
Odan bólek, federaldy qaýipsizdik qyzmet Prıgojınniń buıryǵyna baǵynyp, orys halqyna qarsy qylmys jasamaýǵa jáne qatelik boı aldyrmaýǵa shaqyrdy.
Reseıdiń qorǵanys mınıstrligi, ishki ister mınıstrligi men federaldy qyzmet Pýtınge táýlik boıy qabyldanǵan shara boıynsha baıandap otyrady. Bul týraly Kremldiń resmı ókili Dmıtrıı Peskov habarlady.
BAQ málimetinshe, Dondaǵy Rostov aımaǵynda brondalǵan tehnıka baıqalǵan. Keıin kóshedegi kameralar isten shyǵypty. Al "Vkontakte" men Iandeks Prıgojınniń málimdemesin buǵattaı bastaǵan.
Aıta keteıik, Reseılik jýrnalıst, Nobel syılyǵynyń ıegeri Dmıtrıı Mýratovtyń oqıǵaǵa qatysty pikirin jarııalaǵan edik. Odan bólek, Qazaqstannyń Reseıdegi elshiligi Reseıdiń Ýkraınamen shekaralas aımaqtarynda oryn alǵan qaýipsizdik jaǵdaılaryna baılanysty bul aımaqtarǵa barmaýǵa keńes berip, málimdeme jasady.
Prıgojınniń búligine Reseı prezıdenti Vladımır Pýtın pikir bildirdi. Ol “Vagner” basshysyn satqyn dep aıyptap, búlikti basýǵa buıryq berdi.
Bul ótken ǵasyrdyń basynda boldy: sodan keıin Azamat soǵysy boldy, orystar orystardy óltirdi. Bundaı jaǵdaıdyń qaıtalanýyna jol bermeımiz, halyqty ishki satqyndyqtan saqtaımyz. Bul – satqyndyq. Shamadan tys ambıııalar satqyndyqqa ákeldi, - dedi Pýtın vıdeoúndeýinde.
Bul úndeýge Prıgojın de únsiz qalmady. Ol Pýtınniń qate tańdaý jasaǵanyn aıtyp, taıaýda jańa prezıdent keletinin de habarlady.
