قىتاي سۋاستى قايىقتارىن جاساۋدا رەسەي مەن اقش-تى باسىپ وزدى

قىتاي سۋاستى قايىقتارىن دامىتۋ قارقىنى بويىنشا الەمدىك كوشباسشىعا اينالدى، دەپ حابارلايدى "ادىرنا" ۇلتتىق پورتالى. 

باق مالىمەتىنشە، 2021 جىلدان بەرى ەلدىڭ كەمە جاساۋ زاۋىتتارى 24 سۋاستى قايىعىن سۋعا تۇسىرگەن. بۇل رەسەيدىڭ وسى كەزەڭدە جاساعان 12 سۋاستى قايىعىنان ەكى ەسە، ال اقش-تىڭ جەتى سۋبماريناسىنان ءۇش ەسەدەن استام كوپ.

جالپى العاندا، سوڭعى بەس جىلدا الەمنىڭ شامامەن 16 مەملەكەتى 77 سۋاستى قايىعىن پايدالانۋعا بەرگەن. ونىڭ 33-ءى – قىتاي، رەسەي، اقش، ۇلىبريتانيا، فرانتسيا جانە ءۇندىستاندا جاسالعان اتومدىق سۋاستى قايىقتارى.

سونىمەن قاتار برازيليا مەن سولتۇستىك كورەيا دا اتومدىق سۋاستى قايىقتارىن جاساپ جاتىر، بىراق ولاردىڭ جوبالارى ازىرگە سىناق كەزەڭىنە جەتكەن جوق. ال وڭتۇستىك كورەيا مەن اۋستراليا بولاشاقتا وزدەرىنىڭ اتومدىق سۋاستى قايىعىن قۇرۋ جوسپارىن جاريالاعان.

ساراپشىلاردىڭ ايتۋىنشا، قىتايدىڭ ارتىقشىلىعى تەك ءوندىرىس كولەمىمەن شەكتەلمەيدى. سوڭعى بەس جىلدا ەل جەتى جاڭا سۋاستى قايىعى جوباسىن سىناقتان وتكىزىپ، جاڭا تەحنولوگيالاردى ەنگىزۋ قارقىنىن دا ايتارلىقتاي جەدەلدەتكەن.

بۇدان بولەك، قىتاي كولەمى كادىمگى سۋاستى قايىقتارىمەن شامالاس كەلەتىن XXLUUV كلاسىنداعى ءىرى ۇشقىشسىز سۋاستى اپپاراتتارىن جاساۋ باعىتىندا دا كوش باستاپ كەلەدى.

باق دەرەگىنشە، مۇنداي اۋقىمدا مۇنداي تەحنيكانى ەشبىر مەملەكەت ءوندىرىپ جاتقان جوق.