Memleket basshysy Oqý-aǵartý mınıstrin qabyldady, dep habarlaıdy “Adyrna”.
Búgin Oqý-aǵartý mınıstri Ǵanı Beısembaev Prezıdentke mektepke deıingi, orta, tehnıkalyq jáne kásiptik bilim berý salalaryn damytý maqsatynda jasalynyp jatqan jumystardy baıandady.
Mınıstrdiń málimdeýinshe, bıyl pedagogtardy attestattaý rásimi jetildirilip jatyr. Endi ustazdardyń kásibı biliktiligi óz pánin qanshalyqty jetik biletinine, al jumys nátıjesi bilim alýshylardyń oqý jetistikteri negizinde baǵalanbaq. Sondaı-aq Ǵanı Beısembaev birqatar ózgeristerdi tizbektedi. Bilim salasynda:
- Qyrkúıek aıynan bastap mektepke deıingi bilim berý mekemelerindegi pedagogtardyń eńbekaqysy 30 paıyzǵa ósedi;
- Jyl sońyna deıin balabaqshalarda 81 myń oryn ashý josparlanýda;
-Halyqtyń áleýmettik osal toptaryna jatatyn 98 myń bala tegin ystyq tamaqpen qamtamasyz etiledi;
- 1 qyrkúıekten bastap 1-4 synyp oqýshylary tolyqtaı tegin tamaqpen qamtamasyz etiledi. Sondaı-aq bilim berý uıymdaryn dabyl túımelerimen, lıenzııasy bar kúzetpen, týrnıkettermen jáne jedel basqarý ortalyqtaryna qosylǵan beınebaqylaý júıelerimen jabdyqtaý josparlanyp otyr;
- Bıyl tehnıkalyq jáne kásiptik bilim alýshy stýdentterdiń 80 paıyzy tegin oqıdy. Qyrkúıek aıynan bastap olardyń shákirtaqysy 50 paıyzǵa, al kelesi jyly 100 paıyzǵa artady. Kásiporyndar kolledj túlekterin mindetti túrde jumysqa ornalastyrý shartymen mamandardy maqsatty daıarlaý isine alǵash ret atsalysyp otyr.
Memleket basshysy Qasym-Jomart Toqaev Oqý-aǵartý mınıstri Ǵanı Beısembaevqa bilim berý júıesin odan ári jetildirýdi mindettep, balalardyń qaýipsizdigin qamtamasyz etý isine udaıy kóńil bólýdi tapsyrdy.
