سەنات توراعاسى ماۋلەن اشىمباەۆ وسكەمەن تۇرمەسىندە جازاسىن وتەپ جاتقان سەرىك كۇدەباەۆتىڭ سۋرەتىنە جانە اقمولاداعى تۇرمەدەگى ازاپتاۋ وقيعاسىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
بۇعان دەيىن جەلىدە اتباسار اۋدانىنداعى №1 تۇزەۋ مەكەمەسىنىڭ قىزمەتكەرلەرى سوتتالعاندارعا كۇش قولدانعانى تۋرالى ۆيدەو تاراعان ەدى.
«وسى وقيعا بويىنشا ءتيىستى تەرگەۋ جۇرگىزىلىپ، جاۋاپتىلاردىڭ بارلىعى زاڭ اياسىندا جازاعا تارتىلادى. وعان ەش كۇمان بولماۋعا ءتيىس. بۇل ماسەلەلەردى ەسكەرىپ، قىلمىستىق كودەكستى تاعى قاراپ شىعامىز»،—دەدى اشىمباەۆ.جۋرناليستەر سەنات سپيكەرىنەن سەرىك كۇدەباەۆتىڭ تۇرمەدەگى سۋرەتىنە قاتىستى تۇسىنىكتەمە بەرۋدى سۇرادى. «تۇرمەگە سمارتفوندار ەمىن-ەركىن كىرگىزىلىپ جاتىر ما؟ جازاسىن وتەۋشىلەر داستارحان جايىپ، تويدا وتىرعانداي سۋرەتكە تۇسكەن»،—دەدى باق وكىلدەرى.
«سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى بار جانە بۇل كوميتەت قۇقىق قورعاۋ ورگاندارىمەن تىعىز بايلانىستا جۇمىس ىستەپ جاتىر. اتالعان كوميتەت قۇرامىنداعى دەپۋتاتتار ۇكىمەت مۇشەلەرىن شاقىرىپ، بۇل ماسەلەگە قاتىستى تالداۋ جاسايمىز. قىلمىستىق-اتقارۋ جۇيەسىندە پروبلەمالاردىڭ بار ەكەنىن مويىنداۋىمىز كەرەك»،— دەپ ءتۇسىندىردى پالاتا توراعاسى.
ۇقساس جاڭالىقتار
