30 جىل بۇرىن...
الماتىدان نارىنقولعا شىققان جولاۋشىلار اۆتوبۋسى شەلەكتىڭ اسحاناسىنا تۇمسىعىن تىرەي توقتادى.
-ەكى ساعاتتان كەيىن كەلەمىن،-دەدى شوپىرىمىز، -جاقسىلاپ تاماقتانىپ، اجەتحاناعا بارىپ الىڭدار! جول الىس!
ونىڭ ايتقانى-زاڭ! وتىز شاقتى جولاۋشى توپىرلاپ اسحاناعا بەتتەدىك. ارامىزدا اسكەردەن ۇيىنە قايتىپ بارا جاتقان جاس جىگىت بار ەدى، سول كيمەلەپ ءبىرىنشى كىرىپ كەتتى. ەلدىڭ ءدامىن ابدەن ساعىنىپ-اق قالعان ەكەن، العان تاماعى سۇمدىق ەندى. ۇيعىردىڭ لاعمانى، وزبەكتىڭ پالاۋى، قازاقتىڭ قۋىرداعى دەگەندەي...ايتەۋىر، تاۋىستى. ءتىپتى سالاتقا دەيىن تىقىرلاتىپ جەپ قويدى.
...اۆتوبۋسىمىز كوكپەكتىڭ جازىعىنا شىعا بەرە سولداتتان بەرەكە كەتتى. ءالسىن-ءالسىن شوپىرعا بارىپ، قۇلاعىنا سىبىرلايدى. ول باسىن شايقايدى. بايقۇس بالا بوزارىپ، تەرلەپ كەتتى. ءتۇسىندىم. باعاناعى جەگەن استا-توك تاماق ەندى اسقازاندى قيناپ جاتىر. وبال-اي! مىنا جازىق دالا بىتكەن جەردە ورنالاسقان اقساي اۋىلىنا دەيىن ءالى قىرىق شاقىرىم بار. وعان جەتكەنشە...
سولدات اقىرى شىدامادى. شوپىردى جەڭىنەن جۇلقىپ اۆتوبۋستى توقتاتتى دا جۇگىرە جونەلدى. وتىز جولاۋشى قاراپ وتىرمىز. جىلدامىن-اي، ءبىر كەزدە كىشكەنتاي قارا نوقاتقا اينالىپ، جوق بولدى. ۇلگەرسە ەكەن! تىلەۋىن تىلەپ، مىنا جاقتا ءبىز قالدىق...
30 جىل وتكەن سوڭ...
...تاعى دا سول كوكپەكتىڭ جازىعىمەن ىزعىتىپ كەلەمىز. اۋىلعا، نارىنقولعا بەت الدىق. ءارى-بەرى اعىلعان ماشينە كوپ. ءبىرازى تۋريستەر سەكىلدى. ماشينەلەرىنە ۇيشىك تىركەپ العانداردىڭ قاراسى ءتىپتى مول. ۆەلوسيپەدپەن كەتىپ بارا جاتقانداردى دا كوردىك. شەتەلدىكتەر ەكەن!
-مىنالار شارىنعا كەتىپ بارا جاتقاندار!-دەدى رولدە وتىرعان بوتەك دوسىم، -ارى قاراي كولسايعا دا ءوتۋى مۇمكىن. شۇكىر، تاۋلسىزدىكتىڭ ارقاسىندا مۇنى دا كوردىك.
تاۋبەشىل دوسىمنىڭ سوزىنە مەن دە قاناتتانىپ قالدىم. مىنالار قۇر بارمايدى عوي! ەلگە اقشا تۇسەدى. تۋريزم!
اقسايعا كىرە بەرە بوتەك كىلت توقتادى.
-بوي جازىپ، اجەتحاناعا بارىپ الايىق! ارى قاراي كەگەنگە دەيىن توقتامايمىن!-دەدى ول باياعى شوپىردىڭ اڭگىمەسىن ەسكە ءتۇسىرىپ. "قويدان جۋاس" بولىپ ماشينەدەن ءتۇسىپ جاتىرمىز. اجەتحانا جاققا كەتكەن بوكەم ءبىر كەزدە كەلىپ تۇر.
-سۇمدىق قوي!-دەيدى ول كۇرسىنىپ، -مىناداي توعىز جولدىڭ تورابىنا وتىز جىلدا ءبىر دەنى دۇرىس اجەتحانا سالىپ قويۋعا بولار ەدى عوي! اناۋ كەلە جاتقان شەتەلدىكتەردەن ۇيات بولدى-اۋ!
...دوسىم تومەن قارادى. جۇزىندە جاڭاعى تاۋبەنىڭ ءىزى دە قالماپتى.نەگە ەكەنىن مەنىڭ ەسىمە وتىز جىل بۇرىنعى سولداتتىڭ ورالعانى... ەن دالادا ءىشىن ۇستاپ جۇگىرىپ بارادى...
ارمان سقابىلۇلى
