رەسەي پرەزيدەنت ۆلاديمير ءپۋتيننىڭ رەزيدەنتسياسىنا «شابۋىل جاسالدى» دەگەن مالىمدەمەسىنە ءالى ەشقانداي دالەل ۇسىنبادى. بۇل تۋرالى ۋكراينا سىرتقى ىستەر ءمينيسترى اندرەي سيبيگا ايتتى، دەپ حابارلايدى «ادىرنا» ءتىلشىسى.
«ارادا ءبىر تاۋلىككە جۋىق ۋاقىت وتسە دە، رەسەي ۋكرايناعا تاعىلعان ايىپتاۋ بويىنشا بىردە-ءبىر سەنىمدى دالەل كەلتىرگەن جوق، كەلتىرمەيدى دە. ويتكەنى ونداي دالەل جوق. مۇنداي شابۋىل بولماعان»، – دەپ جازدى ول X الەۋمەتتىك جەلىسىندە.
سيبيگا بۇل وقيعاعا قاتىستى ءباا، ءۇندىستان جانە پاكىستاننىڭ الاڭداۋشىلىق ءبىلدىرۋى تاڭعالارلىق جاعداي ەكەنىن اتاپ ءوتتى.
«بۇل ءۇش مەملەكەتتىڭ 2025 جىلعى 7 قىركۇيەكتە رەسەي زىمىرانى ۋكراينانىڭ ۇكىمەت عيماراتىنا تيگەن كەزدە ەشقانداي رەسمي مالىمدەمە جاساماعانىن ەسكەرسەك، بۇل ءتىپتى ەرەكشە تاڭعالدىرادى»، – دەدى مينيستر.
سىرتقى ىستەر ءمينيسترى رەسەيدىڭ «جالعان مالىمدەمەلەرگە تولى ۇزاق تاريحى» بار ەكەنىن ەسكە سالدى.
«رەسەي 2022 جىلدىڭ باسىندا ۋكرايناعا شابۋىل جاسامايتىنىن مالىمدەگەن بولاتىن. ولار ءجيى وزدەرى جوسپارلاپ وتىرعان ارەكەتتەرى ءۇشىن وزگەلەردى ايىپتايدى. ولاردىڭ ءسوزىن ەشقاشان شىندىق رەتىندە قابىلداۋعا بولمايدى»، – دەدى ۋكراين ديپلوماتياسىنىڭ باسشىسى.
سونداي-اق ول مەملەكەتتەردى تەكسەرىلمەگەن ايىپتاۋلارعا رەاكتسيا بىلدىرۋدەن باس تارتۋعا شاقىردى. ايتۋىنشا، بۇل سوڭعى ۋاقىتتا العا جىلجىپ كەلە جاتقان سىندارلى بەيبىت ۇدەرىستى «السىرەتەدى».
ەسكە سالايىق، بۇعان دەيىن پرەزيدەنت قاسىم-جومارت توقاەۆتىڭ رەسەي پرەزيدەنتىنىڭ رەزيدەنتسياسىنا جاسالعان شابۋىلدى ايىپتاعانىن جازعان ەدىك.
