مانەرلەپ سىرعاناۋدان سايتامادا (جاپونيا) ءوتىپ جاتقان الەم چەمپيوناتىندا قازاقستاندىق ەليزابەت تۇرسىنباەۆا ايەلدەر اراسىنداعى جارىستا كۇمىس مەدال الدى.
22 ناۋرىزدا وتكەن نەگىزگى باعدارلامادا تۇرسىنباەۆا 4 اينالىم سالحوۆ (4S) ەلەمەنتىن سەكىردى. ول ءتورت اينالىم ەلەمەنت سەكىرگەن العاشقى ايەل مانەرلەپ سىرعاناۋشى رەتىندە تاريحقا ەندى. بۇعان دەيىن مانەرلەپ سىرعاناۋ تاريحىندا 16 جاستان اسقان ايەلدەر اراسىندا ەشكىم ءتورت اينالىم ەلەمەنت سەكىرمەگەن.
تۇرسىنباەۆا نەگىزگى باعدارلامادا استور پياتستسوللانىڭ "Otoño Porteño" (بۋەنەس ايرەستەگى ءتورت مەزگىل) مۋزىكاسىنا بيلەپ، 148,80 ۇپاي جينادى. ال 19 ناۋرىزدا وتكەن قىسقا باعدارلامادا بەتحوۆەننىڭ "Piano Sonata №14" مۋزىكاسىنا بيلەپ، 75,96 ۇپاي العان. قوس باعدارلاما ناتيجەسى – 224,76 ۇپاي (جەكە رەكورد).
تۇرسىنباەۆا بىرنەشە جىل كانادادا برايان ورسەردىڭ قول استىندا جاتتىققان. ال 2018 جىلى رەسەيلىك باپكەر ەتەري تۋربەريدزەنىڭ كومانداسىنا اۋىسقان، ماسكەۋدە جاتتىعادى. تۇرسىنباەۆانى بيىلعى الەم چەمپيوناتىنا تۋتبەريدزە دايىندادى.
جاپونياداعى الەم چەمپيوناتىندا التىن جانە قولانى رەسەيلىك الينا زاگيتوۆا (237,50) مەن ەۆگەنيا مەدۆەدوۆا (223,80) يەلەندى. زاگيتوۆا تۋتبەريدزەنىڭ، مەدۆەدەۆا ورسەردىڭ كومانداسىندا جاتتىعادى.
"ەندىگى ماقسات - ءۇش اينالىم اكسەل"
جارىستان كەيىن تۇرسىنباەۆا الەم چەمپيوناتىندا قىسقا جانە نەگىزگى باعدارلامادا بىردە-ءبىر رەت قۇلاماي، ونەر كورسەتكەنىنە قۋانىشتى ەكەنىن ايتتى.
- كۇمىس مەدال العانىما، 4 اينالىم سالحوۆ ەلەمەنتىن سەكىرگەنىمە وتە قۋانىشتىمىن. سەبەبى وسىعان دەيىنگى ەكى جارىستا ء(تورت قۇرلىق چەمپيوناتى مەن ۋنيۆەرسيادادا – رەد.) 4 اينالىم سالحوۆ سەكىرگەندە قۇلاپ قالعان ەدىم. بۇگىن تاڭەرتەڭ باعدارلامامدى دايىنداپ، قايتالاعان كەزدە ءتورت اينالىم سالحوۆتان قۇلادىم. بىراق مۇزعا شىققاندا وزىمە سەندىم. بۇل بيىلعى سوڭعى جارىسىم. ەندى باسقا قيىن ەلەمەنتتەردى سەكىرىپ ۇيرەنەمىن. الداعى ۋاقىتتا ءۇش اكسەل (ايەلدەر اراسىندا بۇل ەلەمەنتتى جاپونيالىق ريكا كيحارا مەن رەسەيلىك ەليزابەتا تۋكتامىشەۆانىڭ عانا باعدارلاماسىندا بار - رەد.) سەكىرگىم كەلەدى، - دەدى سپورتشى.
مانەرلەپ سىرعاناۋ سپورتى جايلى پوست جازىپ، وسى سپورتتى زەرتتەپ جۇرگەن بلوگەر جاننا قارشىعانوۆا تۋتبەريدزەنىڭ كومانداسىنا اۋىسقانى تۇرسىنباەۆانىڭ ناتيجەسىنە وڭ اسەر ەتكەنىن ايتادى.
- تۇرسىنباەۆا ورسەردەن كەتىپ، تۋتبەريدزەگە اۋىسقاندا نە وسەدى، نە وشەدى دەپ ويلادىم. وسكەنىنە قۋانىشتىمىن. تەك ەندى جاتتىعۋىن ازايتىپ، جاراقاتتان ساقتانۋى كەرەك. ءتورت قۇرلىق چەمپيوناتى مەن الەم چەمپيوناتىندا كۇمىس الدى. باسەكەگە قابىلەتتى سپورتشىعا اينالدى. تورەشىلەردىڭ الدىندا بەدەلى ءوستى. كەلەر جىلى بالكىم نەگىزگى باعدارلامادا 4 اينالىم سالحوۆ ەلەمەنتىن ەكى رەت سەكىرەر، كىم ءبىلسىن. ەگەر بۇل ەلەمەنتتى ەكى رەت سەكىرسە، كەلەر جىلى دا تۇرسىنباەۆادان جاقسى ناتيجە كۇتۋگە بولادى، - دەدى ول.
"دەنيس تەننىڭ ءىزىن جالعاستىرۋشى"
كەلەر جىلى ەرەسەكتەر اراسىنداعى جارىسقا 4 اينالىم ەلەمەنت سەكىرە الاتىن رەسەيلىك ەكى سپورتشى قوسىلادى. ولار – 4 اينالىم تۋلۋپ، لۋتتس، سالحوۆ سەكىرەتىن الەكساندرا ترۋسوۆا جانە 4 اينالىم لۋتتس سەكىرەتىن اننا ششەرباكوۆا. ولار 4 اينالىم ەلەمەنتتەردى جاسوسپىرىمدەر اراسىنداعى جارىستاردا سەكىرىپ ءجۇر. ترۋسوۆا مەن ششەرباكوۆا دا تۋتبەريدزەنىڭ كومانداسىندا جاتتىعادى
سپورت تاقىرىبىندا جازىپ جۇرگەن بلوگەر ەرىك ءىلياسوۆتىڭ ايتۋىنشا، كەلەر جىلى مانەرلەپ سىرعاناۋدا ايەلدەر اراسىندا باسەكە ارتادى.
- تۇرسىنباەۆا بيىل اشىلا تۇسكەن. كەلەر جىلى ترۋسوۆا جانە ششەرباكوۆامەن باسەكەگە تۇسە الادى دەپ ويلايمىن. دەنەسى شاعىن، سالماعى از. بۇل مانەرلەپ سىرعاناۋ ءۇشىن ماڭىزدى. كەلەسى جىلى 4 اينالىم سالحوۆقا تاعى ءبىر ءۇش اينالىم ەلەمەنت قوسىپ، قيىن ءارى قۇنى جوعارى كاسكاد (ەكى ەلەمەنتتىڭ قوسىندىسى – رەد.) سەكىرەدى دەپ ويلايمىن. - دەيدى ول.
بىرنەشە وليمپيادا چەمپيونىن، ونداعان الەم چەمپيونىن باپتاپ شىعارعان 72 جاستاعى رەسەيلىك جاتتىقتىرۋشى تاتيانا تاراسوۆا تەلەارنا ەفيرىندە "4 اينالىم سالحوۆ ەلەمەنتىن تەحنيكالىق تۇرعىدان تازا ورىندالعانىن" ايتتى.
"تۇرسىنباەۆا 4 اينالىم سالحوۆ ەلەمەنتىن الەم چەمپيوناتىندا سەكىردى. بۇل تاريحي ءساتتى ەستە ساقتاڭىزدار. تۇرسىنباەۆا تۋتبەريدزەنىڭ كومانداسىنا اۋىسقالى مۇلدەم وزگەرگەن. تەحنيكاسى، قيمىلدارى دامىعان. تانىماي قالدىم" دەدى تاراسوۆا.
جارىس اياقتالعان سوڭ تاراسوۆا Instagram پاراقشاسىندا تۇرسىنباەۆانى جەڭىسىمەن قۇتتىقتاپ، ونى "دەنيس تەننىڭ ءىزىن جالعاستىرۋشى" دەپ اتادى.
تۇرسىنباەۆا اقپاننىڭ ورتاسىندا اقش-تا وتكەن ءتورت قۇرلىق چەمپيوناتىندا 207 ۇپايمەن كۇمىس مەدال العان ەدى.
تۇرسىنباەۆا 2016 جىلى ليللەحاممەردە (نورۆەگيا) وتكەن جاسوسپىرىمدەر اراسىنداعى قىسقى وليمپيادادا قولا العان. 2018 جىلى ساپپورودا (جاپونيا) وتكەن ازيا ويىندارىنىڭ قولا جۇلدەگەرى.
تۇرسىنباەۆا – الەم چەمپيوناتىندا مەدال العان ەكىنشى قازاقستاندىق مانەرلەپ سىرعاناۋشى. قازاقستاندىق دەنيس تەن 2013 جىلعى الەم بىرىنشىلىگىندە كۇمىس، 2015 جىلعى الەم چەمپيوناتىندا قولا العان.
رۋسلان مەدەلبەك
"ازاتتىق" راديوسى
