Elızabet Tursynbaeva álemnen olja salǵan tuńǵysh qazaq qyzy!

744

22 naýryzda ótken negizgi baǵdarlamada Tursynbaeva 4 aınalym salhov (4S) elementin sekirdi. Ol tórt aınalym element sekirgen alǵashqy áıel mánerlep syrǵanaýshy retinde tarıhqa endi. Buǵan deıin mánerlep syrǵanaý tarıhynda 16 jastan asqan áıelder arasynda eshkim tórt aınalym element sekirmegen.

Tursynbaeva negizgi baǵdarlamada Astor Pıaollanyń "Otoño Porteño" (Býenes Aırestegi tórt mezgil) mýzykasyna bılep, 148,80 upaı jınady. Al 19 naýryzda ótken qysqa baǵdarlamada Bethovenniń "Piano Sonata №14" mýzykasyna bılep, 75,96 upaı alǵan. Qos baǵdarlama nátıjesi – 224,76 upaı (jeke rekord).

Tursynbaeva birneshe jyl Kanadada Braıan Orserdiń qol astynda jattyqqan. Al 2018 jyly reseılik bapker Eterı Týrberıdzeniń komandasyna aýysqan, Máskeýde jattyǵady. Tursynbaevany bıylǵy álem chempıonatyna Týtberıdze daıyndady.

Japonııadaǵy álem chempıonatynda altyn jáne qolany reseılik Alına Zagıtova (237,50) men Evgenııa Medvedova (223,80) ıelendi. Zagıtova Týtberıdzeniń, Medvedeva Orserdiń komandasynda jattyǵady.

"ENDIGI MAQSAT - ÚSh AINALYM AKSEL"

Jarystan keıin Tursynbaeva álem chempıonatynda qysqa jáne negizgi baǵdarlamada birde-bir ret qulamaı, óner kórsetkenine qýanyshty ekenin aıtty.

- Kúmis medal alǵanyma, 4 aınalym salhov elementin sekirgenime óte qýanyshtymyn. Sebebi osyǵan deıingi eki jarysta (Tórt qurlyq chempıonaty men ýnıversıadada – red.) 4 aınalym salhov sekirgende qulap qalǵan edim. Búgin tańerteń baǵdarlamamdy daıyndap, qaıtalaǵan kezde tórt aınalym salhovtan quladym. Biraq muzǵa shyqqanda ózime sendim. Bul bıylǵy sońǵy jarysym. Endi basqa qıyn elementterdi sekirip úırenemin. Aldaǵy ýaqytta úsh aksel (áıelder arasynda bul elementti japonııalyq Rıka Kıhara men reseılik Elızabeta Týktamyshevanyń ǵana baǵdarlamasynda bar - red.) sekirgim keledi, - dedi sportshy.

Tursynbaeva álem chempıonatynda. Saıtama, 22 naýryz 2019 jyl.
Tursynbaeva álem chempıonatynda. Saıtama, 22 naýryz 2019 jyl.

Mánerlep syrǵanaý sporty jaıly post jazyp, osy sportty zerttep júrgen bloger Janna Qarshyǵanova Týtberıdzeniń komandasyna aýysqany Tursynbaevanyń nátıjesine oń áser etkenin aıtady.

- Tursynbaeva Orserden ketip, Týtberıdzege aýysqanda ne ósedi, ne óshedi dep oıladym. Óskenine qýanyshtymyn. Tek endi jattyǵýyn azaıtyp, jaraqattan saqtanýy kerek. Tórt qurlyq chempıonaty men álem chempıonatynda kúmis aldy. Básekege qabiletti sportshyǵa aınaldy. Tóreshilerdiń aldynda bedeli ósti. Keler jyly bálkim negizgi baǵdarlamada 4 aınalym salhov elementin eki ret sekirer, kim bilsin. Eger bul elementti eki ret sekirse, keler jyly da Tursynbaevadan jaqsy nátıje kútýge bolady, - dedi ol.

"DENIS TENNIŃ IZIN JALǴASTYRÝShY"

Keler jyly eresekter arasyndaǵy jarysqa 4 aınalym element sekire alatyn reseılik eki sportshy qosylady. Olar – 4 aınalym týlýp, lýt, salhov sekiretin Aleksandra Trýsova jáne 4 aınalym lýt sekiretin Anna erbakova. Olar 4 aınalym elementterdi jasóspirimder arasyndaǵy jarystarda sekirip júr. Trýsova men erbakova da Týtberıdzeniń komandasynda jattyǵady

Sport taqyrybynda jazyp júrgen bloger Erik Ilııasovtyń aıtýynsha, keler jyly mánerlep syrǵanaýda áıelder arasynda báseke artady.

- Tursynbaeva bıyl ashyla túsken. Keler jyly Trýsova jáne erbakovamen básekege túse alady dep oılaımyn. Denesi shaǵyn, salmaǵy az. Bul mánerlep syrǵanaý úshin mańyzdy. Kelesi jyly 4 aınalym salhovqa taǵy bir úsh aınalym element qosyp, qıyn ári quny joǵary kaskad (eki elementtiń qosyndysy – red.) sekiredi dep oılaımyn. - deıdi ol.

Birneshe olımpıada chempıonyn, ondaǵan álem chempıonyn baptap shyǵarǵan 72 jastaǵy reseılik jattyqtyrýshy Tatıana Tarasova telearna efırinde "4 aınalym salhov elementin tehnıkalyq turǵydan taza oryndalǵanyn" aıtty.

"Tursynbaeva 4 aınalym salhov elementin álem chempıonatynda sekirdi. Bul tarıhı sátti este saqtańyzdar. Tursynbaeva Týtberıdzeniń komandasyna aýysqaly múldem ózgergen. Tehnıkasy, qımyldary damyǵan. Tanymaı qaldym" dedi Tarasova.

Jarys aıaqtalǵan soń Tarasova Instagram paraqshasynda Tursynbaevany jeńisimen quttyqtap, ony "Denıs Tenniń izin jalǵastyrýshy" dep atady.

Tursynbaeva, Zagıtova, Medvedova úshtigi.
Tursynbaeva, Zagıtova, Medvedova úshtigi.

Tursynbaeva aqpannyń ortasynda AQSh-ta ótken Tórt qurlyq chempıonatynda 207 upaımen kúmis medal alǵan edi.

Tursynbaeva 2016 jyly Lıllehammerde (Norvegııa) ótken jasóspirimder arasyndaǵy qysqy olımpıadada qola alǵan. 2018 jyly Sapporoda (Japonııa) ótken Azııa oıyndarynyń qola júldegeri.

Tursynbaeva – álem chempıonatynda medal alǵan ekinshi qazaqstandyq mánerlep syrǵanaýshy. Qazaqstandyq Denıs Ten 2013 jylǵy álem birinshiliginde kúmis, 2015 jylǵy álem chempıonatynda qola alǵan.

Rýslan Medelbek

"Azattyq" radıosy

Pikirler