كينوگەرلەردىڭ مادەنيەت مينيسترلىگىنە قاراستى "ۇلتتىق كينونى قولداۋ مەملەكەتتىك ورتالىعىنىڭ" شەشىمىنە نارازىلىعىنان ۇكىمەت تولىق حاباردار بولماي شىقتى. حاباردار بولعان كۇننىڭ وزىندە جاعدايدى باقىلاۋدا ۇستاپ وتىرعان جوق. پرەمەردىڭ ورىنباسارى التاي كولگىنوۆتىڭ كەشەگى ارەكەتى سونى كورسەتتى. دەگەنمەن ول كينوگەرلەردى قابىلداۋعا ۋادە ەتتى. الايدا مادەنيەت ءمينيسترى الدىندا عانا كينوگەرلەردى قابىلداماي، قايتارىپ جىبەرگەن. كەيبىرىنە ايىپپۇل سالىنعان.
«قابىلدايمىن. اتى-ءجونىن بەرىڭىز»
وتكەن ايدا ءبىر توپ ونەر مايتالماندارى الماتىدان استاناعا كەلىپ، مادەنيەت مينيسترلىگىنىڭ الدىنا ءوز نارازىلاقتارىن بىلدىرگەن بولاتىن. الايدا ەلىمىزدەگى ەڭ جاس مينيستر اسحات ورالوۆتىڭ ءوزى ولاردى قابىلداماعان.
6 ماۋسىمداعى ۇكىمەت وتىرىسىنان كەيىن پرەمەر-مينيستر ءاليحان سمايىلوۆتىڭ يدەولوگياعا جاۋاپتى ورىنباسارى التاي كولگىنوۆتەن كينوگەرلەردىڭ ماسەلەسىن سۇرادىق. ءبىر قىزىعى ۇكىمەتباسىنىڭ ورىنباسارى الماتىدان استاناعا ارنايى كەلگەن ازاماتتاردىڭ ماسەلەسىنەن اسا تانىس ەمەس بولىپ شىقتى.
- بۇل ماسەلەمەن مينيسترلىك اينالىسىپ جاتىر. قازىر مەن سىزگە جاۋاپ بەرە المايمىن. ونى مينيسترلىكتەن سۇراۋ كەرەك. ەگەر قاجەت بولسا، مينيسترلىك جاۋابىن بەرەدى. مەن قازىر جاۋاپ بەرە المايمىن. ولاردىڭ تالاپتارى قانداي ەكەنىن قاراۋىم كەرەك، - دەپ التاي كولگىنوۆ ءتىرى ساسقان.
ارتىنشا «كينوگەرلەردى قابىلدايسىز با؟» دەگەن ساۋالعا ول «قاجەت بولسا قابىلدايمىن، قابىلدايمىن. اتى-ءجونىن بەرىڭىز،» - دەپ ۇكىمەت ءۇيى كورريدورىندا ءتاپ-ءتاۋىر قالبالاقتاپ قالدى.
مينيسترلىك قۇرعان كوميسسيا
بۇعان دەيىن ءبىر توپ كينوگەرلەر "ۇلتتىق كينونى قولداۋ مەملەكەتتىك ورتالىعىنىڭ" شەشىمىنە نارازى بولىپ، الماتىدا ميتينگكە شىققان بولاتىن. كەيىن ازامات شارعىن، ەلزات ەسكەندىر سەكىلدى ازاماتتارعا «زاڭسىز ميتينگ وتكىزدى» دەگەن جەلەۋمەن ايىپپۇل سالىندى.
ماسەلەن، ازامات شارعىن ادىلەتتى شەشىم شىققانشا كۇرەسەتىنىن ايتادى.
- بۇعان دەيىن الەۋمەتتىك جەلىدە «وتىرىكشى ورالوۆ پا، جوق الدە داۋەشوۆ پە؟» دەگەن جازبا جاريالاعان بولاتىنمىن. ماسەلەن، مادەنيەت ۆيتسە-ءمينيسترى نۇرعيسا داۋەشوۆ 18 مامىر كۇنى جاريالاعان جازباسىندا «مينيستر وتكەن جانە وتپەگەن 290 جوبا قايتا تەكسەرىلسىن» دەپ تاپسىرما بەرگەنىن جازدى. بىراق ولار مادەنيەت كوميتەتىنىڭ بۇرىنعى ءتورايىمى روزا كارىپجانوۆانىڭ بۇيرىعى ارقىلى تەك قانا وتپەگەن 153 جوبانى قايتا قارايتىن بولادى. ءبىز سول كەزدە مينيسترلىك تاراپىنان قۇرىلعان كوميسسياعا سەنىمسىزدىك بىلدىرەتىنىمىزدى ايتتىق. ويتكەنى ءاۋ باستاعى تالابىمىز بويىنشا كوميسسيانىڭ قۇرامىندا ءبىزدىڭ تاراپىمىزدان ەكى تاۋەلسىز زاڭگەر جانە قازىبەك يسا كوميسسيا توراعاسى بولسىن دەپ ايتقانبىز. بىراق مينيسترلىك ءبىزدىڭ بۇل تالابىمىزدى ورىندامادى. كوميسسيا قۇرامىنا قازىبەك يسانى كىرگىزدى دە، مينيسترلىكتەن 3 ادام جانە كاسىپكەرلەر وداعىنان ءبىر زاڭگەردى الىپ، جالپى 5 ادامدى الىپ كەلىپ وتىر. ال قازىبەك يسا پلەنارلىق وتىرىستار كەزىندە كوميسسيا وتىرىسىنا تولىق قاتىسا المايدى ەكەن. ەرتەڭ قانداي دا ءبىر ماسەلە داۋىسقا سالىنسا، 3/2 نەمەسە 4/1 بولىپ كەتە مە دەپ الاڭداپ وتىرمىز. مىسالى، مينيسترلىكتەن ۇسىنىلىپ وتىرعان 3 ادامنىڭ پوزيتسياسى ارقىلى شەشىم 3/2 داۋىسپەن قابىلدانىپ كەتەدى. مۇنى ءبىز قالاي تاۋەلسىز كوميسسيا دەپ ايتا الامىز. بۇل تاۋەلدى كوميسسيا بولادى. سوندىقتان دا كوميسسياعا سەنىمسىزدىك ءبىلدىرىپ وتىرمىز. بىراق تا كوميسسيا زاڭ بويىنشا قۇرىلىپ، قازىر جۇمىس ىستەپ جاتىر. ءبىز ءوز تاراپىمىزدان بىرنەشە تالاپتاردى ايتتىق. بىراق ونى مينيسترلىك ورىنداپ جاتىر ما، جوق پا ونى قۇداي بىلەدى»، – دەدى اكتەر.
ازامات شارعىن «ءوز باسىم كولگىنوۆ ءبىزدى قابىلدايدى دەگەنگە سەنبەيمىن. بىراق قابىلداسا جاقسى بولار ەدى» دەيدى.
قىسقاسى، اسحات ورالوۆ كەرى قايتارعان كينوگەرلەردى التاي كولگىنوۆ نە ىستەي الادى، كورەلىك.
سەرىك جولداسباي،
"ادىرنا" ۇلتتىق پورتالى
