"ەشقاشان بوتتارمەن جۇمىس ىستەگەن ەمەسپىن". بۇل پىكىردى قر مادەنيەت جانە سپورت ءمينيسترى اسحات ورالوۆ ايتىپ، وزىنە قاتىستى ايتىلىپ جاتقان سىنعا جاۋاپ بەردى، دەپ جازادى "ادىرنا" ۇلتتىق پورتالى.
جۋرناليستەر ۇكىمەت كۋلۋارىندا اسحات ورالوۆتان جەلى قولدانۋشىلارى نە سەبەپتى جاڭا ءمينيستردى "بوتتار مەن فەيكتەردىڭ پاتشاسى" دەپ اتايتىنىن سۇرادى.
"شىنىمدى ايتسام، ەشقاشان بوتتارمەن جۇمىس ىستەگەن ەمەسپىن. ءبىز الەۋمەتتىك جەلىلەردى بەلسەندى تۇردە پايدالانامىز. Instagram مەن Facebook-تى ءوزىم جۇرگىزەمىن. ارقاشان مۇمكىندىگىنشە اشىقپىن. الدىڭعى جۇمىسىمدا دا اشىق بولدىم، قازىر دە جۋرناليستەرمەن اشىق جۇمىس ىستەيتىن بولامىن", – دەدى اسحات ورالوۆ.
ورالوۆ الەۋمەتتىك جەلىدەگى جازبالارىنا نەگە كوپ ادام پىكىر قالدىراتىنىن كەلەسىدەي ءتۇسىندىردى.
"سۇراق قوياتىن ساتتەر بولادى. قولدايتىندار بار، وزەكتى ماسەلەلەردى كوتەرەتىندەر بار. مەن تاعى دا ايتامىن، ءبىز بوتتارمەن جۇمىس ىستەمەيمىز. جەكە ءوزىم ناقتى جۇمىس ىستەمەيمىن", – دەدى مينيستر.
ەستەرىڭىزگە سالا كەتەيىك، اسحات ورالوۆ 2023 جىلدىڭ 4 قاڭتارىنان باستاپ قر مادەنيەت جانە سپورت ءمينيسترى لاۋازىمىنا تاعايىندالدى. بۇعان دەيىن ول Amanat پارتياسىنىڭ اتقارۋشى حاتشىسى قىزمەتىن اتقارعان.
"ادىرنا" ۇلتتىق پورتالى
