جازۋشىلار وداعىنىڭ 19 توراعاسى سايلانعاننان كەيىن وداقتىڭ باعىت-باعدارى قالاي بولادى؟ جاڭا توراعانىڭ العاشقى داۋلى مالىمدەمەسىنەن كەيىن بىردەڭە وزگەرۋى مۇمكىن بە؟
11 مامىردا اباي اتىنداعى وپەرا جانە بالەت تەاترىندا وتكەن جازۋشىلار وداعىنىڭ XVI قۇرىلتايىندا وداقتىڭ جاڭا توراعاسى سايلانىپ، وعان بەس ورىنباسار بەكىتىلگەن. توراعانىڭ سايلانا سالىپ مىنبەردەن ايتقان جازۋشىلاردىڭ وپپوزيتسيا بولمايتىنى جايلى ايتقانى دا كوپشىلىك اراسىندا تالقى تۋدىرعان.
«ەشقاشان ءبىزدىڭ جازۋشىلار وپپوزيتسيا بولمايدى دەپ ەسەپتەيمىن. بولماۋى كەرەك دەپ ەسەپتەيمىن. ويتكەنى وپپوزيتسيا دەگەن — مەملەكەت باسشىسىنا قارسى بولۋ دەگەن ءسوز. مەن وعان كەلىسە المايمىن. قازىرگى پرەزيدەنتىمىز قاسىم-جومارت توقاەۆ ونەر ادامدارىنا، عالىمدارعا، جازۋشىلارعا وتە ەرەكشە كوڭىل ءبولىپ وتىر…” – دەگەن بولاتىن توراعا مەرەكە قۇلكەنوۆ.
ارتىنشا بۇل مالىمدەمەگە نارازىلىعىن بىلدىرگەن قويشىبەك مۇباراك جانە ەسبول نۇراحمەت ءتارىزدى قالامگەرلەر وداققا مۇشەلىكتەن شىعاتىنىن جاريالاعان. ال دۋمان رامازان جازۋشىلار وداعىنداعى قىزمەتىنەن كەتكەندىگىن مالىمدەگەن.
مەرەكە قۇلكەنووۆتىڭ باسشىلىققا كەلۋىنەن جازۋشىلار نە كۇتەدى، وداقتىڭ ءوز جوسپارى قانداي – وسىنى بىلمەك بولدىق.
«وداققا العىس ايتۋىمىز كەرەك!»
اقىن، ءماجىلىس دەپۋتاتى قازىبەك يسادان جازۋشىلار وداعىنىڭ بولاشاعى جايلى سۇرادىق. ول مۇنىڭ جاۋابىن الەۋمەتتىك جەلىگە جازعان پىكىرىنەن الۋىمىزدى ءوتىندى. وندا اقىن وداققا العىس ايتۋ كەرەگىن جازىپتى.
“كەيىنگى بەس جىلدىقتىڭ بەدەرىندە جازۋشىلار وداعىنىڭ جالى كوتەرىلىپ، جارتى الەمدى قامتىعان فورۋمدار وتكىزگەنى، استانانى شىنىندا دا ەۋرازيا كىندىگىنە اينالدىرىپ جىبەرگەنىن سول حالىقارالىق جيىنداردان بايقادىق. مۇندايدا وداققا العىس ايتۋىمىز كەرەك! قازىر ينتەرنەت زامانى بولعاندىقتان، گازەتتىڭ دە سايتىن سايدىڭ تاسىنداي ەتىپ، كۇشەيتۋگە كۇش سالۋىمىز كەرەك، - دەيدى قازىبەك يسا.
ال جاڭادان سايلانعان توراعا مەرەكە قۇلكەنوۆ حابار 24 ارناسىنا بەرگەن سۇحباتىندا الداعى ۋاقىتتا ۇمىت بولعان جانرلارعا باسىمدىق بەرەتىنىڭ، ناقتىراق ايتقاندا سىن جانرى، فانتاستيكالىق جانە شىتىرمان وقيعالى شىعارمالارعا نازار اۋداراتىنىن بىلدىرگەن. سول ءۇشىن دە قارجىلىق قولداۋ بولاتىن سياقتى.
مەملەكەت قارجىلاندىرادى
مەرەكە قۇلكەنوۆتىڭ ايتۋىنشا، «ستراتەگيالىق ارىپتەس» دەگەن پۋنكتپەن زاڭ بويىنشا ەندى قازاقستان جازۋشىلار وداعىن مەملەكەت قارجىلاندىراتىن بولادى.
- بيۋدجەتكە كىرەمىز، قۇداي قالاسا، سوندا ءبىزدىڭ جازۋشىلار وداعىنىڭ ءوزىنىڭ جاعدايى دا، جازۋشىلاردىڭ دا جاعدايى جاقسارادى. اقىن-جازۋشىلاردىڭ كىتابىن شىعارۋعا دا مەملەكەت قاتتى كوڭىل ءبولىپ وتىر. مىسالى، ءسىزدىڭ 20 باسپا تاباق كىتابىڭىز شىقسا، وعان گونارارعا 5 ملن اقشا الاسىز، - دەگەن جاڭا توراعا رەسمي ارناعا بەرگەن سۇحباتىندا.
توراعانىڭ ورىنباسارى بولىپ سايلانعان قاسىمحان بەگمانوۆ ءالى ەشقانداي جۇمىس باستالماعاندىعىن، قازىرگى ۋاقىتتا دوكۋمەنتتەرمەن جانە عيماراتتىڭ جوندەۋ جۇمىستارىمەن، عيماراتتى تەحنيكامەن قامتاماسىز ەتۋ جاعىمەن اينالىسىپ جاتقانىڭ تىلگە تيەك ەتتى. الداعى ايلاردا «تولىقتاي نە ىستەيتىنىمزدى، نە وزگەرەتىنىڭ، نە وزگەرگەنىڭ ايتامىز» دەيدى ول.
ماستەر-كلاس، تالقى جانە ماراپات...
جازۋشىلار وداعى توراعاسىنىڭ تاعى ءبىر ورىنباسارى، جاستار شىعارماشىلىعىنا جاۋاپتى بەيبىت سارىباي ءوز جوسپارىمەن ءبولىسىپ ءوتتى.
- 13 جوبا بويىنشا جۇمىس جاسايمىن، سوعان جوسپار قۇردىم. جازۋشىلار وداعى ۇيىمى جازۋشىعا شىعارما جازىپ بەرمەيدى، بىراق سول شىعارما جازۋىنا جاعداي جاساۋ كەرەك. سول سەبەپتى جوبا بويىنشا كوزدەلىپ وتىرعان ءىستىڭ ءبىرى – ماستەر كلاستار وتكىزۋ. دۋلات يسابەكوۆ، بەكسۇلتان نۇرجەكەۇلى سەكىلدى كورنەكتى اقىن جازۋشىلارىمىزبەن جاس قالامگەرلەردى كەزدەستىرەمىز، - دەيدى ول.
ونىڭ ايتۋىنشا، الماتى قالاسىنداعى ۋنيۆەرسيتەتتەردە ولەڭ جازاتىن، شىعارما جازاتىن جاس تالانتتاردىڭ ءبارىنىڭ باسىن قوسىپ جاستار كلۋبىن قۇرۋ كەرەك.
- بۇل – كەزەكتى جوبامنىڭ ءبىرى. جاستار اراسىندا «تالقى» دەگەن وتىرىسىمىز بار. ول جەردە ەندى جارىق كورگەن كىتاپتاردى الدىن الا وقىپ تالقىلايمىز. وسى جەرىن تولىقتىرۋ كەرەك نەمەسە وسى جەردى الىپ تاستاۋ كەرەك دەگەن سياقتى پىكىرىمىزدى ايتامىز. جازۋشى ونى وزگەرتە مە، وزگەرتپەي مە – ءوزى بىلەدى. ودان كەيىن جارىق كورگەن كىتاپتىن تۇساۋ كەسەرىن وتكىزىپ ناسيحاتتايمىز. تاعى ءبىر جوبام – «جىل تاڭداۋى». جاس اقىن جازۋشىلار ءبىر جىلدا كورىنەدى. قانداي كەرەمەت دۇنيە جازعانى، وقىرماندار اراسىندا مويىندالعان تۋىندىسى بولادى، پروزادان – ءبىر ادام، سىننان – ءبىر ادام، پوەزيادان ءبىر ادام سولاي ءۇش ادامدى اقىلداسىپ ماراپات بەرەمىز، قارجىلاي سىيلىق بەرەمىز. وسى سەكىلدى كوپ جوسپارلار بار، - دەدى بەيبىت سارىباي
وداقتان قانداي وزگەرىستى قالايتىنى تۋرالى جازۋشىلارعا حابارلاسقانىمىزدا، ولار توراعا مەرەكە قۇلكەنوۆ ءوزى جاقىندا جوسپارلاردى جاريالايدى عوي دەپ جوعارىعا سىلتەدى. ال كەيبىر جازۋشىلار سۇحبات بەرۋدەن مۇلدەم باس تارتتى.
مەرحات رافيحۇلى،
"ادىرنا" ۇلتتىق پورتالى
