حالىقارالىق CNN اقپارات اگەنتتىگى يران قارۋىن رەسەيگە تاسىمالدايتىن "جاسىرىن جولدىڭ" بار بولۋى مۇمكىن ەكەندىگىن باجايلادى. ولار شامى ءسوندىرىلىپ، كاسپي تەڭىزىنىڭ بەتىندە جاسىرىن جۇزگەن كەمەلەردىڭ كوبەيگەنىن انىقتاپ، وسىنداي توقتامعا كەلگەن، دەپ حابارلايدى "ادىرنا" ۇلتتىق پورتالى.
يراننان رەسەيگە قارۋ-جاراق جەتكىزۋدىڭ تىكە جولى كاسپيدى بويلاپ، تەڭىز جولدارى ارقىلى ءوتۋى مۇمكىن. ويتكەنى وتكەن جىلدىڭ جازىنان بەرى گەوپوزيتسياسىن اشپاي، باعىتىن جاسىرىن ۇستاعان كەمەلەردىڭ سانى كۇرت وسكەن. CNN كەمەلەردىڭ قوزعالىسى تۋرالى مالىمەتتەر مەن سپۋتنيكتىك سۋرەتتەردى تالداپ، ساراپشىلارمەن سويلەسۋتى. اقىرىندا مۇنداي "جاسىرىن جۇزگەن" كەمەلەرگە قارۋ-جاراق ارتىلعانىنا كوز جەتكىزگەنىن حابارلادى.
2022 جىلدىڭ كۇزىندە اقش پەن ۋكراينا بيلىگى ماسكەۋدىڭ يراندىق درونداردى ساتىپ العانىن مالىمدەدى. مالىمدەمەدەن كەيىن كاسپي تەڭىزى ارقىلى رەسەي مەن يران كەمەلەرى باقىلاۋعا الىندى. دەرەكتەردىڭ كورسەتۋىنشە، كەمە قاتىناسىنىڭ كۇماندى تۇستارى كوپ، دەپ حابارلايدى "Lloyd ' s List Intelligence" تەڭىز اگەنتتىگى. سول كۇزدە ۋكراينانىڭ ەنەرگەتيكالىق ينفراقۇرىلىمىن جويۋدى كوزدەگەن رەسەيلىك اسكەري ساياسات نىعايىپ، دروندارمەن جاسالاتىن شابۋىلدار كۇشەيە تۇسكەن.
ساراپشىلار كەمە قاتىناسىن باقىلاۋ دەرەكتەرىندەگى ولقىلىقتاردىڭ كوپشىلىگى يران مەن رەسەيدىڭ جالاۋلارىن جەلبىرەتكەن تەڭىز كولىكتەرىنىڭ تاراپىنان بولعانىن اتادى. كەمەلەردىڭ يران پورتتارى اميراباد پەن ەنسەلي ماڭىندا، ەدىل مەن استراحان پورتىنىڭ جاعالاۋلارىنا جاناسقانى ايتىلدى.
بۇل كەمەلەردە قانداي جۇك بار ەكەنىن انىقتاۋ قيىنعا سوقسا دا، ساراپشىلار كەمەلەردە قارۋ بولعانىنا باتىستىق بارلاۋشىلاردىڭ كوز جەتكىزگەنىن دە تىلگە تيەك ەتىپ وتىر.
سونىمەن قاتار، ساراپشىلاردىڭ پىكىرىنشە، باتىس ەلدەرىنىڭ مۇنداي تاسىمالدى توقتاتۋعا كۇشى جەتپەيدى. سەبەبى، بۇرىنعى كەڭەس ولكەلەرىنە قالقىعان يران كەمەلەرىنەن قاۋىپ كورىپ وتىرعان مەملەكەتتەر جوق.
ۋكراينا مەن باتىس ەلدەرى رەسەيدىڭ سوعىستا يراندىق Shahed-136 دروندارىن قولدانعانىن دەپ بىرنەشە رەت قاداپ ايتقان. باستاپقىدا قوس ەل دە درونداردى ساتىپ الىپ، سوعىسقا سالۋدان باس تارتتى. بىراق 2022 جىلدىڭ قاراشاسىندا يران سىرتشى ىستەر مينيسترلىگى درون تاسىپ جاتقاندارىن العاش رەت مويىندادى. ولاردىڭ ايتۋىنشا، كەمەلەرگە تيەلگەن دروندار سوعىستان بۇرىن دا رەسەيگە جەتكىزىلىپ تۇرعان.
سۋرەتتە: استراحان پورتىنداعى رەسەيلىك كەمە (سول جاقتا) / CNN
ورايى كەلگەندە ايتا كەتەيىك، يران كاسپي تەڭىزىن قازاقستانمەن بىرگە ءبولىسىپ وتىرعان مەملەكەتتەردىڭ ءبىرى. ونىڭ سۋى 5 مەملەكەتتىڭ جاعالاۋىن شايىپ جاتىر. ەڭ الىپ كولدىڭ ەڭ ۇلكەن اۋماعى دا قازاقستاننىڭ ۇلەسىندە.
"ادىرنا" ۇلتتىق پورتالى
