شەشەنستان باسىشى وسى جولى دا توسىن مالىمدەمە جاسادى. ول چەحياداعى ات قورادان ۇرلانعان سايگۇلىگىنىڭ تابىلعانىن حابارلادى. ءوزىنىڭ ايتۋىنشا، قۇيرىق جالى توگىلگەن "ازبان-كۇرەڭىن" بارىمتالاعان ۋكراينانىڭ بارلاۋ اگەنتتىكتەرى. ەۋروپا سالعان سانكتسيا سالقىنى دا العاش تۇلپاردىڭ "شابىسىن شەكتەۋدەن" باستالىپتى. بۇل جايلى "ادىرنا" ۇلتتىق پورتالى حابارلايدى.
شەشەنستان باسشىسى رامزان قادىروۆ 2023 جىلى ناۋرىزدا ليتومەرجيتسە قالاسىنداعى ات قورادان ۇرلانعان زازۋ اتتى جۇيرىك ايعىرىن قايتارىپ العانىن حابارلادى.
- جىلدىڭ باسىندا مەنىمەن ءبىر ادامدار ارقىلى ۋكراينانىڭ بارلاۋ قىزمەتى بايلانىستى. ولار زازۋىمدى سالىپ الۋعا قۇلشىنىپ وتىرعانىن جەتكىزدى. باس تارتتىم، ارينە. بىراق بارلاۋ اگەنتتىكتەرىنىڭ ايرىقشا جوسپارى بار ەكەن. ولار تۇلپاردى چەحياداعى ات قورادان ۇرلاۋ ءۇشىن چەح پوليتسەيلەرىمەن ءسوز بايلاسقان. قىمبات جىلقىنىڭ اياق استىنان ۇشتى-كۇيلى جوعالىپ كەتۋى مۇمكىن بە؟ شىنتۋايتىندا، مۇمكىن ەكەن، - دەدى قادىروۆ.
ونىڭ ايتۋىنشا، وسقىرىنىپ، بابىندا تۇرعان جيرەن قاسقا تۇلپارىن قايتارىپ الۋ ءۇشىن 18 مىڭ دوللار تولەگەن ء(وزى ونى "تيىن-تەبەن"دەپ اتادى). الايدا، شەشەنستان باسشىسىنىڭ اسىعا كۇتكەنىنە قاراماستان، تۇلپارعا سالىنعان سانكتسيالار كۇشىندە قالدى.
"2014 جىلى ەۋروپالىق سانكتسيالاردىڭ سوققىسى العاش مەنىڭ تۇلپارىما ءتيدى. ول باتىستىق وزبىرلىقتىڭ قۇربانى بولدى. جىلدار بويى چەحيانىڭ ات قورالارىنىڭ بىرىندە "تۇرمەدە وتىردى". ەندى عانا ءبارىن اشىق ايتا الامىز. ۋايىمداماڭىز، زازۋدا ءبارى جاقسى", - دەدى قادىروۆ الەۋمەتتىك جەلىلەردەگى وقىرماندارىنا.
ورايى كەلگەندە ايشىقتاي كەتەيىك، ناۋرىز ايىنىڭ باسىندا قادىروۆتىڭ "اتتاي قالاپ العان" ايعىرىنىڭ ۇرلانعانى تۋرالى چەح بۇقارالىق اقپارات قۇرالدارى حابارلادى. پوليتسيانىڭ مالىمەتىنشە، ات قوراعا كىرگەن ادام جۇگەندەگى قاۋىپسىزدىك تىزبەگىن الىپ تاستاپ، اتتى جەتەكتەپ كەتكەن. چەحيا پوليتسياسى اتتىڭ قۇنىن، شامامەن، 19 مىڭ دوللارعا باعالاعان.
"بارىمتاعا" تۇسكەن جيرەن قاسقا پراگا حالىقارالىق سانكتسيالار نەگىزىندە شەكتەۋگە الىنعان قادىروۆ مۇلىكتەرىنىڭ تىزىمىندە بار. Jezdci.cz-ءدىڭ جازۋىنشا، قادىروۆ سايگۇلىكتى 2012 جىلى وتكەن دۋباي الەم كۋبوگىنا قاتىستىرۋ ءۇشىن WH Sport International نەمىس كومپانياسىنان ساتىپ العان. الاماندا زازۋ بەسىنشى كەلگەن. يەسىمەن بىرگە سانكتسيالاردان كوز اشپاعان سايگۇلىك وسى ۋاقىتقا دەيىن 36 جارىسقا قاتىسىپ، توعىزىن جەڭىپ، 1,2 ميلليون ەۋرودان استام تابىس تاپقان.
"ادىرنا" ۇلتتىق پورتالى
