جەڭىس كۇنىنە وراي ۇيىمداستىرىلعان ماسكەۋدەگى شەرۋدى تاماشالاۋعا 6 مەملەكەتتىڭ باسشىسى باردى. ولاردىڭ قاتارىندا ارمەنيا، قازاقستان، قىرعىزستان، وزبەكستان، تاجىكستان جانە بەلارۋس ەلدەرى باسشىلارى بار. بىلتىرعى قىزىل الاڭدا وتكەن شەرۋگە ءبىر دە ءبىر ەلدىڭ باسشىسى بارماعان ەدى، دەپ حابارلايدى "ادىرنا" ۇلتتىق پورتالى.
9 مامىر، بۇگىن، ماسكەۋدەگى شەرۋگە بەلارۋس پرەزيدەنتى الەكساندر لۋكاشەنكو اسىعا جەتتى. جۋرناليستەر باسشىنىڭ كولىگىن قالا كوشەلەرىنەن بايقاعانىن جازدى. بۇعان دەيىن لۋكاشەنكو ماسكەۋدەگى ۇيىمداستىرىلعان شەرۋدە ءبىر رەت قانا توبە كورسەتكەن ەدى. ول ۇدايى مينسكىدەگى مەرەكەلىك ءىس-شارالارعا بولا اسكەري شەرۋگە قاتىسۋدان باس تارتاتىن.
جەڭىس كۇنى ماسكەۋگە وزبەكستان پرەزيدەنتى شاۆكات ميرزيەەۆ باردى، دەپ حابارلايدى تاسس. ءبىر ەرەكشەلىگى، وزبەكستان مەملەكەتى ەگەمەندىكتەن كەيىن، ەلىن يسلام كاريموۆ باسقارىپ تۇرعاندا، ەكىنشى دۇنيەجۇزىلىك سوعىسقا قاتىستى جاڭا تاريحي باعا بەرگەنى بايقالادى. وزبەكستاندا سوڭعى بىرنەشە جىل بويى "ۇلى وتان سوعىسى" تىركەسى قولدانىلمايتىن بولعان. ونىڭ ورنىشا وزبەكتەر "ەكىنشى جاھان سوعىسى" اتاۋىن دۇرىس دەپ تاپقان. نەگىزىنەن العاندا، وزبەكستاندا 9 مامىر سوعىس قۇرباندارى مەن ارداگەرلەرىن ەسكە الۋ جانە قۇرمەتتەۋ كۇنى رەتىندە اتاپ وتىلەدى.
سونىمەن قاتار، تاجىكستان پرەزيدەنتى ەمومالي راحمون ۆلاديمير ءپۋتيننىڭ شاقىرۋىمەن ماسكەۋگە ارنايى ات باسىن بۇردى. تاجىكستان باسشىسى جەڭىس كۇنىنە ارنالعان مەرەكەلىك ءىس-شارالارعا قاتىسۋدى جوسپارلاپ وتىر، ساپار ەكى كۇنگە سوزىلادى.
قىرعىزستان پرەزيدەنتى سادىر جاپاروۆ تا ساپارمەن ماسكەۋدە ءجۇر. سونداي-اق، ارمەنيا پرەمەر-ءمينيسترى نيكول پاشينيان مەن قازاقستان پرەزيدەنتى قاسىم-جومارت توقاەۆتىڭ قىزىل الاڭداعى شەرۋدى تاماشالايدى.
رەسەي باسىلىمدارى قاسىم-جومارت توقاەۆتىڭ ماسكەۋگە كەشە جەتىپ العانىن جازدى. قازاقستان مەن قىرعىزستان پرەزيدەنتتەرى قاسىم-جومارت توقاەۆ پەن سادىر جاپاروۆ ءوز ساپارلارىن تۆەر وبلىسى، رجەۆسك اۋدانىنداعى مەموريالعا گۇل شوقتارىن قويۋدان باستاعان.
بيىل جەڭىس كۇنىنە 78 جىل. وتكەن جىلعى ماسكەۋ شەرۋىن تاماشالاۋعا بىردە-ءبىر شەتەلدىك كوشباسشى بارماعان ەدى.
ورايى كەلگەندە ايتا كەتەيىك، 2014 جىلى قىرىم مەن سەۆاستوپول ايماعىندا باستالعان رەسەي-ۋكراينا قاقتىعىستارى ءالى جالعاسىپ جاتىر. 2021 جىلدان باستاپ بۇل قاقتىعىس ءورشي ءتۇستى. سول جىلدىڭ 21 اقپانىندا رەسەي بيلىگى ء"وز-ءوزىنىڭ" ەگەمەندىگىن جاريالاعان كحدر مەن لنر-ءدىڭ تاۋەلسىزدىگىن مويىندادى. 2022 جىلى 24 اقپاندا ۋكرايناعا تولىققاندى شابۋىل جاساپ، ايماعىنا باسىپ كىردى.
2023 جىلى 17 ناۋرىزدا گااگاداعى حالىقارالىق قىلمىستىق سوت ۆلاديمير ءپۋتيندى ۇستاۋعا شەشىم شىعاردى.
ايتا كەتۋ كەرەك، قازاقستاننىڭ ۇلتتىق اقپاراتتىق كەڭىستىگىندە دە "ۇلى وتان سوعىسى" تىركەسىنە قاتىستى كوزقاراس وزگەرە باستاعانى بايقالادى. الەۋمەتتىك جەلى قولدانۋشىلارى كوبىنە "ەكىنشى دۇنيەجۇزىلىك سوعىس" اتاۋىنىڭ دۇرىس ەكەنىن ايتىپ، دالەلدەۋمەن بولادى.
"ادىرنا" ۇلتتىق پورتالى
