ماڭعىستاۋ وبلىسىندا اسكەري-تەڭىز وقۋ-جاتتىعۋى كەزىندە 14 اسكەري قىزمەتشىنىڭ قازا تابۋىنا بايلانىستى تەرگەۋ جۇمىستارى اياقتالۋعا جاقىن، دەپ حابارلايدى "ادىرنا" ۇلتتىق پورتالى.
قازىر ءىس بويىنشا 300-دەن استام ادامنان جاۋاپ الىنىپ، 30-دان اسا سوت ساراپتاماسى مەن زەرتتەۋ جۇرگىزىلگەن.
بۇل تۋرالى باس پروكۋراتۋرانىڭ ءباسپاسوز قىزمەتى ايتتى.
ۆەدومستۆونىڭ حابارلاۋىنشا، قايعىلى وقيعانىڭ بارلىق ءمان-جايىن انىقتاۋ ماقساتىندا كەشەندى تەرگەۋ جۇرگىزىلگەن. تەرگەۋ اياسىندا قىزمەتكە سالعىرت قارادى جانە كەمە جۇرگىزۋ قاعيدالارىن بۇزدى دەگەن كۇدىكپەن سەگىز لاۋازىمدى تۇلعا سوت سانكتسياسىمەن قاماۋعا الىنعان. ولاردىڭ قاتارىندا قارۋلى كۇشتەردىڭ اسكەري-تەڭىز كۇشتەرىنىڭ باس قولباسشىسى، ونىڭ ءبىرىنشى ورىنباسارى مەن جاۋىنگەرلىك دايارلىق جونىندەگى ورىنباسارى، ەكى اسكەري ءبولىمنىڭ كومانديرلەرى، تەڭىز جاياۋ اسكەرى باتالونى مەن روتاسىنىڭ كومانديرلەرى، سونداي-اق كاتەر كاپيتانى بار.
باس پروكۋراتۋرا مالىمەتىنشە، جاقىن ارادا تەرگەۋدى اياقتاپ، قىلمىستىق پروتسەسكە قاتىسۋشىلاردى ءىس ماتەريالدارىمەن تانىستىرۋ جوسپارلانىپ وتىر. تەرگەۋ بارىسى ۆەدومستۆونىڭ ەرەكشە باقىلاۋىندا.
ەسكە سالايىق، 24 قىركۇيەكتە ماڭعىستاۋ وبلىسىندا اسكەري-تەڭىز وقۋ-جاتتىعۋى كەزىندە قايعىلى وقيعا بولعان. جاعالاۋدا وقۋ-جاۋىنگەرلىك تاپسىرمالاردى ورىنداۋ بارىسىندا اۋا رايى كۇرت بۇزىلىپ، جەل كۇشەيگەن. سونىڭ سالدارىنان تەڭىزدە 17 اسكەري قىزمەتشى قالىپ قويعان. ولاردىڭ ۇشەۋى قۇتقارىلىپ، 14-ءى قازا تاپتى.
وقيعادان كەيىن مەملەكەت باسشىسى قاسىم-جومارت توقاەۆ قورعانىس مينيسترلىگىنە كەشەندى تەكسەرۋ جۇرگىزۋدى تاپسىردى. پرەزيدەنت اسكەردەگى جۇيەلى ماسەلەلەرگە نازار اۋدارىپ، اسكەري قىزمەتشىلەردىڭ قازا بولۋىن وفيتسەرلەردىڭ، سونىڭ ىشىندە گەنەرالداردىڭ كاسىبي مىندەتتەرىن تيىسىنشە ورىنداماۋىمەن بايلانىستىردى. 21 قازاندا قاۋىپسىزدىك كەڭەسىنىڭ وتىرىسىندا اسكەري رەفورمانىڭ جوسپارى ماقۇلداندى. ال 24 قازاندا قورعانىس مينيسترلىگى رەفورمانى ىسكە اسىرۋ جۇمىستارى باستالعانىن حابارلادى.
