Jeńis kúnine oraı uıymdastyrylǵan Máskeýdegi sherýdi tamashalaýǵa 6 memlekettiń basshysy bardy. Olardyń qatarynda Armenııa, Qazaqstan, Qyrǵyzstan, Ózbekstan, Tájikstan jáne Belarýs elderi basshylary bar. Byltyrǵy Qyzyl alańda ótken sherýge bir de bir eldiń basshysy barmaǵan edi, dep habarlaıdy "Adyrna" ulttyq portaly.
9 mamyr, búgin, Máskeýdegi sherýge Belarýs Prezıdenti Aleksandr Lýkashenko asyǵa jetti. Jýrnalıster basshynyń kóligin qala kóshelerinen baıqaǵanyn jazdy. Buǵan deıin Lýkashenko Máskeýdegi uıymdastyrylǵan sherýde bir ret qana tóbe kórsetken edi. Ol udaıy Mınskidegi merekelik is-sharalarǵa bola áskerı sherýge qatysýdan bas tartatyn.
Jeńis kúni Máskeýge Ózbekstan prezıdenti Shavkat Mırzıeev bardy, dep habarlaıdy TASS. Bir ereksheligi, Ózbekstan memleketi egemendikten keıin, elin Islam Karımov basqaryp turǵanda, Ekinshi dúnıejúzilik soǵysqa qatysty jańa tarıhı baǵa bergeni baıqalady. Ózbekstanda sońǵy birneshe jyl boıy "Uly Otan soǵysy" tirkesi qoldanylmaıtyn bolǵan. Onyń ornysha ózbekter "Ekinshi jahan soǵysy" ataýyn durys dep tapqan. Negizinen alǵanda, Ózbekstanda 9 mamyr soǵys qurbandary men ardagerlerin Eske alý jáne qurmetteý kúni retinde atap ótiledi.
Sonymen qatar, Tájikstan prezıdenti Emomalı Rahmon Vladımır Pýtınniń shaqyrýymen Máskeýge arnaıy at basyn burdy. Tájikstan basshysy Jeńis kúnine arnalǵan merekelik is-sharalarǵa qatysýdy josparlap otyr, sapar eki kúnge sozylady.
Qyrǵyzstan prezıdenti Sadyr Japarov ta saparmen Máskeýde júr. Sondaı-aq, Armenııa premer-mınıstri Nıkol Pashınıan men Qazaqstan prezıdenti Qasym-Jomart Toqaevtyń Qyzyl alańdaǵy sherýdi tamashalaıdy.
Reseı basylymdary Qasym-Jomart Toqaevtyń Máskeýge keshe jetip alǵanyn jazdy. Qazaqstan men Qyrǵyzstan prezıdentteri Qasym-Jomart Toqaev pen Sadyr Japarov óz saparlaryn Tver oblysy, Rjevsk aýdanyndaǵy memorıalǵa gúl shoqtaryn qoıýdan bastaǵan.
Bıyl Jeńis kúnine 78 jyl. Ótken jylǵy Máskeý sherýin tamashalaýǵa birde-bir sheteldik kóshbasshy barmaǵan edi.
Oraıy kelgende aıta keteıik, 2014 jyly Qyrym men Sevastopol aımaǵynda bastalǵan Reseı-Ýkraına qaqtyǵystary áli jalǵasyp jatyr. 2021 jyldan bastap bul qaqtyǵys órshı tústi. Sol jyldyń 21 aqpanynda Reseı bıligi "óz-óziniń" egemendigin jarııalaǵan KHDR men LNR-diń táýelsizdigin moıyndady. 2022 jyly 24 aqpanda Ýkraınaǵa tolyqqandy shabýyl jasap, aımaǵyna basyp kirdi.
2023 jyly 17 naýryzda Gaagadaǵy Halyqaralyq qylmystyq sot Vladımır Pýtındi ustaýǵa sheshim shyǵardy.
Aıta ketý kerek, Qazaqstannyń ulttyq aqparattyq keńistiginde de "Uly Otan soǵysy" tirkesine qatysty kózqaras ózgere bastaǵany baıqalady. Áleýmettik jeli qoldanýshylary kóbine "Ekinshi dúnıejúzilik soǵys" ataýynyń durys ekenin aıtyp, dáleldeýmen bolady.
"Adyrna" ulttyq portaly
