تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ەلورداداعى №58 ۋچاسكەدە ءوز تاڭداۋىن جاسادى، دەپ حابارلايدى “ادىرنا” ءتىلشىسى.
سونداي-اق، ول نە سەبەپتى الى كۇنگە دەيىن قاشىقتان ەمەس، ەسكى ادىسپەن، ياعني، بيۋللەتەندەردىڭ كومەگىمەن داۋىس بەرەتىنىمىزدى ايتتى.
ءمينيستردىڭ ايتۋىنشا، ەلەكتروندى داۋىس بەرۋدى ەنگىزۋ ءۇشىن باقىلاۋشىلاردىڭ ءوزى باعدارلاماشى بولۋى كەرەك. سونداي-اق قاعاز بيۋللەتەندەردى ەمەس، باعدارلاماداعى كودتاردى قاراپ، ءبارىنىڭ ادال جانە اشىق ەكەنىنە كوز جەتكىزۋى ءتيىس.
سونداي-اق، باعدات مۋسين كەلەشەكتە داۋىس بەرۋ جۇيەسىنە 2 جاڭاشىلدىق ەنگىزۋ جوسپارلانىپ وتىرعانىن ءمالىم ەتتى. سوزىنشە، مۇنداي ءتاسىل سايلاۋ پروتسەسىنە جالعان بيۋللەتەندەردىڭ قوسىلۋىن بولدىرمايدى.
ء"بىز ورتالىق سايلاۋ كوميسسياسىمەن بىرگە ەكى ماسەلەنى تالقىلاپ جاتىرمىز. مىسالى، داۋىس بەرۋشىنى سايلاۋ وكرۋگىنە بەكىتۋ جانە تىركەۋدەن شىعارۋ ماسەلەسى بار. ءبىر وبلىستان ەكىنشى وبلىسقا بارىپ داۋىس بەرەتىن بولسا، تۇرعىلىقتى وكرۋگتە تىركەۋدەن شىعۋى كەرەك. كەلەشەكتە وسىنى ونلاين تۇردە جاساۋعا بولادى", - دەدى ول دەپۋتاتتار سايلاۋىندا داۋىس بەرىپ بولعاننان كەيىن.
باعدات مۋسين سايلاۋ جاشىكتەرىن جاڭا تەحنولوگيامەن جابدىقتاۋ ماسەلەسى تالقىلانىپ جاتقانىن دا اتاپ ءوتتى.
"جاشىككە بيۋللەتەندى سالعان كەزدە قانشا بيۋللەتەن تۇسكەنىن اۆتوماتتى تۇردە كورسەتىپ تۇرسا دەگەن ويىمىز بار. ياعني، مۇنداي تەحنولوگيا سالعان بيۋللەتىنىڭىزدىڭ ەشقانداي قولدان جاسالعان قۇجات ەمەس ەكەنىن، زاڭدى قۇجات ەكەنىن راستايدى. سايلاۋ جاشىگى قازىرگىدەي بولادى. بىراق كىشكەنتاي كومپيۋتەرلەرى بولادى. وسىنداي ۇسىنىس بار. قازىرگى تاڭدا بۇل بىرنەشە ەلدە جۇزەگە اسىرىلعان", - دەدى مينيستر.
