قازاقستاننىڭ مما بوكسشىسى قۋات حاميتوۆ قازاق بالۋاندارىنىڭ جەتىستىگىن اتاپ ءوتىپ، ولارعا فۋتبولشىلاردىڭ جالاقىسىن بەرۋ كەرەگىن ايتتى. بۇل تۋرالى ول جەلىدەگى پاراقششاسىنا ۆيدەو جاريالاعان. ونىڭ پىكىرىمەن كەلىسەتىندەر دە بار، قارسىلار دا كەزدەسەدى.
ء“بىزدىڭ بالۋاندار ازيادا ءبىرىنشى ورىنعا شىقتى. مەن بارلىعىنا ءوتىنىش ايتامىن: ازيا چەمپيوناتىنىڭ جۇلدەگەرلەرىنە فۋتبولشىلاردىڭ جالاقىسى بەرىلۋى كەرەك دەپ ەسەپتەيمىن. سپورت دەگەن – ناتيجە. سپورتتا ناتيجە ءۇشىن تولەيدى. ولارعا فۋتبولشىلاردىڭ اي سايىنعى الاتىن 20, 25-30 مىڭ دوللاردى ازيادا چەمپيون بولعان، كۇمىس، قولا جۇلدەگەرى بولعاندارعا بەرۋ كەرەك. ويتكەنى، ءبىزدىڭ فۋتبولشىلار ەشقاشان ازيا چەمپيونى بولا المايدى. ولار ءتىپتى كورشىلەرىمىزدى دە جەڭە المايدى»، - دەدى حاميتوۆ.
ەسكە سالا كەتەيىك، 9-14 ءساۋىر ارالىعىندا وتكەن ازيا چەمپيوناتىنىڭ مەدالدىق ەسەپتە قازاق بالۋاندارى ءبىرىنشى ورىن العان بولاتىن. قازاقستاندىق سپورتشىلار بارلىعى جەتى التىن، ءتورت كۇمىس جانە توعىز قولا مەدال جەڭىپ الدى.
«اقىلعا سىيمايدى»
سپورتشىنىڭ بۇل سوزىنە قالاي قارايتىنىن ءبىلۋ ءۇشىن سپورت ءجۋرناليسى ەسەي جەڭىسۇلىنا سۇراق قويۋدىڭ ءساتى ءتۇستى. ايتۋىنشا، ءبىر سپورتتىڭ اقشاسىن وزگە سپورت تۇرىنە ءبولىپ بەرگەنشە، بارلىق سپورتتى بۇقارالىق تۇرگە اينالدىرعان ءجون.
«قۋاتتىڭ سوزىندە جاناشىرلىق بار. ءبىزدىڭ سپورتشىلار ازيانى جەڭىپ، وليمپيادان دا، مەدالدان دا ءۇمتتى بولۋى مۇمكىن دەگەن وي جاتىر. الايدا، فۋتبول – بۇقارالىق سپورت ءتۇرى. كەز-كەلگەن جەردە، مەكتەپتە، اۋىلدا بالالاردىڭ وينايتىنى، وسى – فۋتبول. ايتەۋىر ءبىر دوپ تابىلسا بولدى جانە ويناۋ ءۇشىن كەم دەگەندە التى بالا كەرەك بولادى. سوندىقتان مەنىڭ ويىمشا، ءبىز كەرسىنشە فۋتبولدىڭ بۇقارالىعىن دامىتا بەرۋىمىز كەرەك. ويتكەنى، بۇل – بۇكىل الەمدەگى تەندەنتسيا. ءبىز قالاساق تا، قالاماساق تا فۋتبولدىڭ جالاقىسى وتە جوعارى. قازاقستان وعان ىلەسپەسە كوشتەن قالادى. وعان ىلەسپەسە فۋتبولدىڭ بۇقارالىق سيپاتى جوعالادى. تالاي بالانىڭ ارمانى ولەدى»، - دەدى سپورت ءجۋرناليستى ەسەي جەڭىسۇلى.
سونداي-اق، ول قازىرگى بالالاردىڭ شامامەن 70 پايىزى باسقا سپورت تۇرلەرىنە قاراعاندا، فۋتبولدى جاقسى كورەتىنىن ايتتى.
«ءبىزدىڭ فۋتبولىمىز ناشار ەكەن دەپ ونىڭ اقشاسىن ءبولىپ بەرە سالۋ اقىلعا سىيمايتىن سياقتى. كەرىسىنشە، فۋتبولدىڭ ينفراقۇرىلىمدارىن جاقسىلاپ دامىتۋىمىز كەرەك. قازىرگى «وقجەتپەس»، «كاسپي»، «قىزىلجار» كوماندالارى وسىعان دەيىن وزدەرىنىڭ قالالارىندا ويناعان جوق. ويتكەنى، ستاديوندارى دايىن ەمەس. «كاسپي» سوناۋ اقتاۋدان كەلىپ، الماتىدا ويناپ ءجۇر، ءوز الاڭىنداعى ويىندارىن «وقجەتپەس» استانا - ارەنادا وتكىزدى. «قىزىلجار» پاۆلودارعا بارىپ، ءبىر-ەكى ويىن وتكىزدى. اقتوبەنىڭ دە ستاديونى دايىن بولماي، قازىر سپورت مەكتەبىنىڭ ستاديونىندا ويناپ جاتىر. دەمەك، ءبىزدىڭ كوماندالار وسىنداي سىنعا قالماس ءۇشىن، ءوزىنىڭ ينفراقۇرىلىمىن وتە جاقسى دامىتۋ كەرەك. ارينە، 30 جىلدىق فۋتبولدا ناتيجەمىز بولمادى دەپ ەۋروپا چەمپيوناتىنا شىقپادى، الەم چەمپيونانتىنا شىقپادى دەپ سان سوعۋىمىزعا بولار. بىراق فۋتبولدىڭ بۇقارالىعىن ۇمىتپاۋىمىز كەرەك. فۋتبول سياقتى بۇكىل الەمدى اۋزىنا قاراتقان سپورت ءتۇرى جوق. ال جەكە سپورتشىلارعا ەشقانداي قارسى ەمەسپىن. وعان مەملەكەت كومەكتەسىپ جاتىر مۇمكىندىگىنشە. قازاقستان الەمدىك سپورتتىڭ جالپى العىشارتتارىن قابىلداپ، كىرىسىپ جاتىر. سوندىقتان بىرەۋدىكىن بىرەۋگە ءبولىپ بەرۋ دەگەننەن كورى، كەز-كەلگەن سپورتتى بۇقارالىق دامىتۋ كەرەك دەگەنگە باس ۇرامىن»، - دەدى ەسەي جەڭىسۇلى.
«تولىقتاي كەلىسەمىن»
«اlash Pride» جەكپە-جەك كلۋبىنىڭ پرەزيدەنتى، ءماجىلىس دەپۋتاتى دانيار قاسقاراۋوۆ بولسا، قۋات حاميتوۆتىڭ ايتقانىنا كەلىسەتىنىن ءبىلدىردى. ول فۋتبولعا كوپ شىعىن جۇمسالعانىمەن، ونىڭ اقتالارىنا كۇمانداناتىنىن جاسىرمادى.
«مەن قۋات حاميتوۆتىڭ ايتقانىمەن تولىقتاي كەلىسەمىن. ول وسىنى بۇرىننان ايتىپ كەلەدى. فۋتبول الەمدەگى ءبىرىنشى سپورت ەكەنىن بىلەمىز. الايدا، شىنىمەن دە كوپ قاراجات كەتەدى. سپورتشىلاردىڭ كوبى سپورتتان كەتكەننەن كەيىن، بالا-شاعاسىن باعا الماعاننان كەيىن، كىشكەنتاي جالاقىعا جاتتىقتىرۋشى بولىپ كەتەدى. جۇمىسسىز جۇرگەندەرى دە، دالادا قالعاندارى دا قانشاما. قۋات تا سپورتشى بولعاندىقتان، ءوزى بارلىعىن بىلەدى. ونىڭ ۋايىمداپ ايتىپ جاتقانى دۇرىس. قازاقستاندا ەكونوميكا دامىپ، باسقا مەملەكەتتەردەن جاقسى، تۇراقتى بولعاننىڭ وزىندە دە، اۋىلدان كەلگەن تالانتتى جاستارعا كوڭىل بولىنە بەرمەيدى. سوندىقتان قۋاتتىڭ ايتقاندارى ورىندى»، - دەيدى دانيار قاسقاراۋوۆ.
