Qazaqstannyń MMA boksshysy Qýat Hamıtov qazaq balýandarynyń jetistigin atap ótip, olarǵa fýtbolshylardyń jalaqysyn berý keregin aıtty. Bul týraly ol jelidegi paraqasyna vıdeo jarııalaǵan. Onyń pikirimen kelisetinder de bar, qarsylar da kezdesedi.
“Bizdiń balýandar Azııada birinshi orynǵa shyqty. Men barlyǵyna ótinish aıtamyn: Azııa chempıonatynyń júldegerlerine fýtbolshylardyń jalaqysy berilýi kerek dep esepteımin. Sport degen – nátıje. Sportta nátıje úshin tóleıdi. Olarǵa fýtbolshylardyń aı saıynǵy alatyn 20, 25-30 myń dollardy Azııada chempıon bolǵan, kúmis, qola júldegeri bolǵandarǵa berý kerek. Óıtkeni, bizdiń fýtbolshylar eshqashan Azııa chempıony bola almaıdy. Olar tipti kórshilerimizdi de jeńe almaıdy», - dedi Hamıtov.
Eske sala keteıik, 9-14 sáýir aralyǵynda ótken Azııa chempıonatynyń medaldyq esepte qazaq balýandary birinshi oryn alǵan bolatyn. Qazaqstandyq sportshylar barlyǵy jeti altyn, tórt kúmis jáne toǵyz qola medal jeńip aldy.
«AQYLǴA SYIMAIDY»
Sportshynyń bul sózine qalaı qaraıtynyn bilý úshin sport jýrnalısi Eseı Jeńisulyna suraq qoıýdyń sáti tústi. Aıtýynsha, bir sporttyń aqshasyn ózge sport túrine bólip bergenshe, barlyq sportty buqaralyq túrge aınaldyrǵan jón.
«Qýattyń sózinde janashyrlyq bar. Bizdiń sportshylar Azııany jeńip, Olımpıadan da, medaldan da úmtti bolýy múmkin degen oı jatyr. Alaıda, fýtbol – buqaralyq sport túri. Kez-kelgen jerde, mektepte, aýylda balalardyń oınaıtyny, osy – fýtbol. Áıteýir bir dop tabylsa boldy jáne oınaý úshin kem degende alty bala kerek bolady. Sondyqtan meniń oıymsha, biz kersinshe fýtboldyń buqaralyǵyn damyta berýimiz kerek. Óıtkeni, bul – búkil álemdegi tendenııa. Biz qalasaq ta, qalamasaq ta fýtboldyń jalaqysy óte joǵary. Qazaqstan oǵan ilespese kóshten qalady. Oǵan ilespese fýtboldyń buqaralyq sıpaty joǵalady. Talaı balanyń armany óledi», - dedi sport jýrnalısti Eseı Jeńisuly.
Sondaı-aq, ol qazirgi balalardyń shamamen 70 paıyzy basqa sport túrlerine qaraǵanda, fýtboldy jaqsy kóretinin aıtty.
«Bizdiń fýtbolymyz nashar eken dep onyń aqshasyn bólip bere salý aqylǵa syımaıtyn sııaqty. Kerisinshe, fýtboldyń ınfraqurylymdaryn jaqsylap damytýymyz kerek. Qazirgi «Oqjetpes», «Kaspıı», «Qyzyljar» komandalary osyǵan deıin ózderiniń qalalarynda oınaǵan joq. Óıtkeni, stadıondary daıyn emes. «Kaspıı» sonaý Aqtaýdan kelip, Almatyda oınap júr, óz alańyndaǵy oıyndaryn «Oqjetpes» Astana - Arenada ótkizdi. «Qyzyljar» Pavlodarǵa baryp, bir-eki oıyn ótkizdi. Aqtóbeniń de stadıony daıyn bolmaı, qazir sport mektebiniń stadıonynda oınap jatyr. Demek, bizdiń komandalar osyndaı synǵa qalmas úshin, óziniń ınfraqurylymyn óte jaqsy damytý kerek. Árıne, 30 jyldyq fýtbolda nátıjemiz bolmady dep Eýropa chempıonatyna shyqpady, álem chempıonantyna shyqpady dep san soǵýymyzǵa bolar. Biraq fýtboldyń buqaralyǵyn umytpaýymyz kerek. Fýtbol sııaqty búkil álemdi aýzyna qaratqan sport túri joq. Al jeke sportshylarǵa eshqandaı qarsy emespin. Oǵan memleket kómektesip jatyr múmkindiginshe. Qazaqstan álemdik sporttyń jalpy alǵysharttaryn qabyldap, kirisip jatyr. Sondyqtan bireýdikin bireýge bólip berý degennen kóri, kez-kelgen sportty buqaralyq damytý kerek degenge bas uramyn», - dedi Eseı Jeńisuly.
«TOLYQTAI KELISEMIN»
«Alash Pride» jekpe-jek klýbynyń prezıdenti, Májilis depýtaty Danııar Qasqaraýov bolsa, Qýat Hamıtovtyń aıtqanyna kelisetinin bildirdi. Ol fýtbolǵa kóp shyǵyn jumsalǵanymen, onyń aqtalaryna kúmandanatynyn jasyrmady.
«Men Qýat Hamıtovtyń aıtqanymen tolyqtaı kelisemin. Ol osyny burynnan aıtyp keledi. Fýtbol álemdegi birinshi sport ekenin bilemiz. Alaıda, shynymen de kóp qarajat ketedi. Sportshylardyń kóbi sporttan ketkennen keıin, bala-shaǵasyn baǵa almaǵannan keıin, kishkentaı jalaqyǵa jattyqtyrýshy bolyp ketedi. Jumyssyz júrgenderi de, dalada qalǵandary da qanshama. Qýat ta sportshy bolǵandyqtan, ózi barlyǵyn biledi. Onyń ýaıymdap aıtyp jatqany durys. Qazaqstanda ekonomıka damyp, basqa memleketterden jaqsy, turaqty bolǵannyń ózinde de, aýyldan kelgen talantty jastarǵa kóńil bóline bermeıdi. Sondyqtan Qýattyń aıtqandary oryndy», - deıdi Danııar Qasqaraýov.
