20 قازان كۇنى ادىرنا ۇلتتىق پورتالىندا «ماڭعىستاۋلىقتار 5 بيلبوردقا 1 ملن تەڭگەدەن استام قارجى جۇمساماق» دەگەن ماقالا جاريالانعان ەدى. سول ماقالاعا قاتىستى ماڭعىستاۋ وبلىستىق ىشكى ساياسات باسقارماسى جاۋاپ بەردى، - دەپ حابارلايدى ادىرنا ۇلتتىق پورتالى.
اتالعان ماتەريالدا ماڭعىستاۋ وبلىسىنىڭ ىشكى ساياسات باسقارماسى قر ۇلتتىق ۆاليۋتاسىنىڭ 30-جىلدىعىن ءبىر اي عانا ءىلىنىپ تۇراتىن بەس بيلبوردپەن اتاپ وتكەلى وتىرعانى، ول بەس بيلبورد اقتاۋ مەن جاڭاوزەن قالالارىندا عانا قويىلاتىنى، بۇكىل وبلىس تىڭ حالقى ۇلتتىق ۆاليۋتانىڭ تاريحىن ەكى قالاعا ورناتىلعان بەس بيلبوردتان ۇعا قويماسى جازىلعان ەدى. ءبىزدىڭ جولداعان سۇراقتارىمىزعا تومەندەگىدەي جاۋاپ كەلدى.
ماڭعىستاۋ وبلىستىق ىشكى ساياسات باسقارماسى، ءسىزدىڭ ءوتىنىشىڭىزدى قاراپ، كەلەسىنى حابارلايدى.
وزىڭىزگە بەلگىلى، قازاقستان رەسپۋبليكاسىنىڭ ۇلتتىق ۆاليۋتاسىنىڭ 30 جىلدىعى تۋرالى جان-جاقتى اقپاراتتاندىرۋ ماقساتىندا اقتاۋ (4 بىرلىك) جانە جاڭاوزەن (1 بىرلىك) قالالارىندا بيلبورد/باننەر ورنالاستىرۋ جوسپارلانعان.
بۇل جۇمىستار مەملەكەتتىك ساتىپ الۋ پروتسەسىنىڭ شەڭبەرىندە جۇرگىزىلۋدە.
كونكۋرستىق راسىمدەردىڭ تەحنيكالىق تالاپتارىندا باننەردىڭ ەسكيزىن جاساۋ، باسىپ شىعارۋ، بيلبورد ورنالاستىراتىن قوندىرعىنى جالعا الۋ، بيلبوردتى ورنالاستىرۋ جانە شەشىپ الۋ جۇمىستارى كورسەتىلگەن.
وسى جۇمىستارعا بولىنگەن بيۋدجەت اقتاۋ قالاسى بويىنشا جارنامالىق ماتەريالداردى دايىنداۋ مەن ورنالاستىرۋدىڭ ورتاشا سوماسى نەگىزىندە ەسەپتەلگەن:
بيلبورد قۇرىلىمىن 1 ايعا جالعا الۋ (1 بىرلىك) - 150 مىڭ تەڭگە;
باننەردەگى كەڭ فورماتتى باسىپ شىعارۋ (1 بىرلىك) - 71 مىڭ تەڭگە;
جارنامالىق ماتەريالدى مونتاجداۋ/ شەشىپ الۋ 3ح6 م (1 بىرلىك) – 20 مىڭ تەڭگە;
ەسكيز ديزاينىن ازىرلەۋ (1 بىرلىك) - 15 مىڭ تەڭگە;
رۇقسات قۇجاتتارىن رەسىمدەۋ (1 بىرلىك) – 7 مىڭ تەڭگە.
بيلبوردتاردىڭ سانى مەن ولاردى ورنالاستىرۋ ورىندارىن «قر ۇلتتىق بانكى» رەسپۋبليكالىق مەملەكەتتىك مەكەمەسىنىڭ ماڭعىستاۋ فيليالى تاراپىنان بەلگىلەگەنىن اتاپ وتكەن ءجون» دەلىنگەن.
تۇيىندەپ ايتقاندا، ىشكى ساياسات باسقارماسى اقشا بولگەنى بولماسا، بيلبوردتار ماسەلەسىن شەشپەيدى ەكەن. «قر ۇلتتىق بانكى» رەسپۋبليكالىق مەملەكەتتىك مەكەمەسىنىڭ ماڭعىستاۋ فيليالى بەلگىلەگەن بەس بيلبوردتى وبلىستىڭ باسقا اۋداندارىن الالاپ، ەكى قالاعا ءبىر اي مەرزىمگە ورناتا قويىپ، ءتول تەڭگەمىزدىڭ 30 جىلدىعىن وتكىزە سالۋ دۇرىس پا؟
ءسىز نە دەيسىز؟
قانات بىرلىكۇلى
ادىرنا ۇلتتىق پورتالى
