استانادا "ابۋ-دابي پلازا" كەشەنى قۇرىلىسىندا جۇمىس ىستەيتىن ونداعان جۇمىسشى جينالىپ، "نۇر وتان" پارتياسىنا باردى.
مەردىگەر World Monitor كومپانياسىندا جۇمىس ىستەيتىن جۇمىسشىلار پارتيانىڭ استاناداعى فيليالى توراعاسىنىڭ ورىنباسارى باقىت ساپاروۆپەن كەزدەسىپ، ەكى ايلىق جالاقىسىن الماعانىنا شاعىمداندى. جۇمىسشىلار سونىمەن قاتار قۇرىلىس باسىندا جۇمىس جاعدايىنىڭ ناشارلىعىنا دا شاعىم ايتتى.
ازاتتىق كومپانيانىڭ وزىنە حابارلاسقانىمەن، سويلەسە المادى. جۇمىسشىلار كومپانيا باسشىلىعىمەن وزدەرى دە كەزدەسە المايتىنىن، سەبەبى "ولار مەكەنجايىن ءجيى اۋىستىراتىنىن" ايتادى.
باقىت ساپاروۆ جۇمىسشىلاردان شاعىمىن جازباشا كۇيدە قابىلداپ الىپ، بۇل ماسەلەگە بايلانىستى كومپانيا باسشىلارىمەن جيىن وتكىزەتىنىن جانە وعان ءتيىستى ورگاندار وكىلدەرىن شاقىراتىنىن ايتتى.
_______________________________________________________________________________________________________
azattyq.org
