بۇگىن جاڭوزەندىكتەردىڭ تالابىنا قاتىستى پرەمەر-ءمينيستردىڭ ورىنباسارى التاي كولگىنوۆ ارنايى پىكىر ءبىلدىردى. ۇكىمەت وتىرىسىنان كەيىنگى جيىندا التاي كولگىنوۆ ماسەلەسىنىڭ استارىندا تەندەر مۇددەسىنىڭ بار ەكەنىن "بايقاعانىن ايتىپ", بارلىعىن زاڭ اياسىندا شەشۋدى ۇسىندى، دەپ حابارلايدى "ادىرنا" ۇلتتىق پورتالى.
جاڭاوزەندىك جۇمىسشىلاردىڭ تالابى تۋرالى پىكىرىندە:
«مۇنىڭ ءبارى – كەلىسسىوز ماسەلەسى. ءبارى زاڭ اياسىندا شەشىلۋى كەرەك. ولار تەندەردەن ۇتىلعان كومپانيا قايتادان ۇتىپ شىققانىن قالايدى. بىراق، بۇل مۇمكىن ەمەس. ءبارىن زاڭ اياسىندا جۇرگىزۋ كەرەك. تەندەر تالاپتارى بار، ماسەلەنى سوت تارتىبىمەن نەمەسە زاڭدى نەگىزدە قاراۋ قاجەت. جاي عانا تالاپ ەتۋ – جۇمساقتاپ ايتقاننىڭ وزىندە دۇرىس ەمەس. ءبىزدىڭ مىندەت – ولارعا قولدا بار بوس جۇمىس ورىندارىن ۇسىنۋ. مەملەكەتتىك ورگاندار قازىر سولاي ىستەپ تە جاتىر»، - دەدى ۆيتسە-پرەمەر.
جيىندا جۋرناليستەر كومپانيا لوببيىنە قاتىستى كۇدىكتىڭ كوپ كوكەيىندە جۇرگەنىن دە بۇعىپ قالمادى. باق وكىلدەرى «جۇمىسشىلار تالابى تەندەردەن ۇتىلعان جۇمىس بەرۋشى كومپانيانىڭ ءلوببيى بولۋى مۇمكىن بە؟» دەگەن ساۋال قويدى. وعان قاتىستى:
«بۇل لوببي مە، ول جاعىن اشىپ ايتا المايمىن. ءبارىن زاڭ اياسىندا قاراۋ كەرەك. ۋاكىلەتتى ورگاندار كەلىسسىوز قورىتىندىسى بويىنشا اقپارات بەرەدى. مۇنىڭ ءبارىن اسىرەلەي بەرۋگە بولمايدى. فاكتىلەر بويىنشا قارايىق. ادامداردىڭ تالاپتارىن مەملەكەتتىك ورگاندار ەستىپ وتىر. وزدەرىندە بار وكىلەت اياسىندا ۇسىنىستارىن ايتىپ جاتىر»، - دەدى التاي كولگىنوۆ.
وقىرمان ءۇشىن ورايى كەلگەندە ايتا كەتەيىك، جاڭاوزەندەگى "بەرالى ماڭعىستاۋ Company" كاسىپورنىنىڭ جۇمىستان قىسقارعان 82 جۇمىسشىسى 10 ءساۋىر كۇنى استاناعا كەلىپ، ەنەرگەتيكا مينيسترلىگىنە باردى. ولار مينيسترلىكتەن جۇمىس ماسەلەسىن دۇرىس شەشۋدى تالاپ ەتەدى. جۇمىستان قاعىلعان جاڭاوزەندىكتەر ماسەلەمىز شەشىلمەسە، مينيسترلىك الدىنان كەتپەيمىز دەپ وتىر.
"ادىرنا" ۇلتتىق پورتالى
