مەملەكەت باسشىسى قاسىم-جومارت توقاەۆ اەس قۇرىلىسىن تەزدەتۋ كەرەگىن ايتىپ، ەلدە يادرولىق كلاستەر قۇرۋ ءىسىن قولعا الۋدى تاپسىردى. سونداي-اق تاعى ءبىر اەس سالىناتىن ورىندى ۇسىنۋدى تاپسىردى، دەپ حابارلايدى ”ادىرنا” ۇلتتىق پورتالى.
«ەنەرگەتيكانى دامىتۋ جانە يادرولىق كلاستەر قۇرۋ. ەلىمىز ءوزىن ءوزى ەلەكتر ەنەرگياسىمەن تولىق قامتاماسىز ەتىپ، 15-20 پايىز شاماسىندا رەزەرۆ قالىپتاستىرۋعا ءتيىس. بۇل – ۇكىمەتتىڭ الدىندا تۇرعان مىندەت. سوندىقتان الداعى ەكى جىلدا كەمىندە 3 گيگاۆاتتىق جاڭا قۋات كوزدەرىن ىسكە قوسۋ قاجەت. بۇل – الدىڭعى جىلداردىڭ كورسەتكىشىنەن 2,5 ەسەدەي ارتىق مەجە»،- دەدى پرەزيدەنت.
توقاەۆ كومىرتەگى بەيتاراپتىعىنا قول جەتكىزۋ تۋرالى ستراتەگيالىق باعدار وزگەرمەيتىنىن اتاپ ءوتتى. سونداي-اق قولدا بار تابيعي بايلىقتار مەن مۇمكىندىكتەردى ۇتىمدى پايدالانۋ قاجەتتىگىن ەسكە سالدى. مەملەكەت باسشىسى قىتاي مەن وڭتۇستىك كورەيانىڭ كومىر ستانسالارىن ۇلگى ەتىپ، مىسالعا الدى.
«قىتاي مەن وڭتۇستىك كورەيادا زياندى شىعارىندىلارى از، جاڭا بۋىن كومىر ستانسالارى تابىستى جۇمىس ىستەپ تۇر. وكىنىشكە قاراي، كەزىندە بالقاشتا كومىر ەلەكتر ستانساسى سالىنباي قالدى. سونىڭ كەسىرىنەن ءبىز مىقتى قۋات كوزىنەن ايرىلىپ قالدىق. ال ونداي ستانسا بىزگە قازىرگى تاڭدا ارتىق بولمايتىن ەدى»،- دەپ تولىقتىردى مەملەككەت باسشىسى.
پرەزيدەنت ەلدە ەنەرگيا تاپشىلىعى ارتىپ كەلە جاتقانىن تاعى ءبىر مارتە ەسكە سالىپ ءوتتى. سول سەبەپتى اەس قۇرىلىسىن بارىنشا جەدەلدەتۋدى تاپسىردى.
«جالپى ەلىمىزدە يادرولىق كلاستەر قۇرۋ ءىسىن قولعا الۋ كەرەك. بۇل ەلىمىزدىڭ بولاشاقتا ويداعىداي دامۋىنا قاتىستى اسا ماڭىزدى مىندەت. ۇكىمەتكە «سامۇرىق-قازىنا» قورىمەن بىرلەسىپ، اتوم سالاسىن دامىتۋدىڭ ۇزاق مەرزىمگە ارنالعان جوسپارىن ازىرلەۋدى تاپسىردىم. ناقتى ناتيجە كەرەك. جان-جاقتى تالداۋ جۇرگىزىپ، اتوم ەلەكتر ستانسالارىن سالۋعا بارىنشا قولايلى جەرلەردى، سونداي-اق زاماناۋي جانە قاۋىپسىز تەحنولوگيالاردى انىقتاۋ قاجەت»،- دەدى توقاەۆ.
قاسىم-جومارت توقاەۆ ۇكىمەت پەن پارلامەنتكە ەكىنشى يادرولىق ستانسانى قاي ايماقتا سالۋ قاجەت ەكەنى جونىندە وزىنە ۇسىنىس بەرۋىن تاپسىردى. ءسوز سوڭىندا قازاقستانعا يادرولىق قۋات كەرەك ەكەنىن، ونسىز مەلملەكەت كەلەشەكتە ويداعىداي دامىمايتىنىن اتاپ ءوتتى.
