IMECE اتتى العاشقى تۇرىك باقىلاۋ سپۋتنيگى وربيتاعا 11 ساۋىردە ۇشىرىلادى، دەپ حابارلايدى "ادىرنا" ۇلتتىق پورتالى انادولى اگەنتتىگىنە سىلتەمە جاساپ.
بۇل تۋرالى 9 ءساۋىر، جەكسەنبىدە تۇركيا پرەزيدەنتى رەجەپ تايىپ ەردوعان ءوزىنىڭ Twitter اككاۋنتىندا جازدى.
«تۇركيا بىلىكتى كادرلار، مۇمكىندىكتەر مەن ءوزى جاساعان تەحنولوگياسىن جاھاندىق عارىش بايگەسىنە قوسۋىن جالعاستىرادى»، - دەپ جازدى مەملەكەت باسشىسى.
IMECE سپۋتنيگىن تۇركيانىڭ عارىشتىق تەحنولوگيالار عىلىمي-زەرتتەۋ ينستيتۋتىنىڭ (TÜBITAK UZAY) ينجەنەرلەرى جاساعان.
سەيسەنبى، 11 ساۋىردە سپۋتنيكتىڭ ۇشىرىلۋىنا بايلانىستى ينستيتۋت اۋماعىندا سالتاناتتى ءراسىم وتەدى، وندا جينالعاندارعا تۇركيا پرەزيدەنتى بەينەۇندەۋ جولدايدى.
جيىنعا تۇركيانىڭ ۇلتتىق قورعانىس ءمينيسترى حۋلۋسي اكار مەن تۇركيانىڭ ونەركاسىپ جانە تەحنولوگيالار ءمينيسترى مۇستافا ۆارانك قاتىسادى.
تۇركيانىڭ شەتەلدىك سپۋتنيكتىك تەحنولوگيالارعا تاۋەلدىلىگىن تومەندەتەتىن IMECE سپۋتنيگىن Space X تۇرىك ۋاقىتىمەن تاڭعى 09.50-دە ۇشىرادى.
ءدال سول زىمىران تۇرىك عارىش كومپانيالارى جاساعان AKUP, KILIÇSAT جانە CONNECTA T2.1 سپۋتنيكتەرىن عارىشقا الىپ ۇشادى.
IMECE سپۋتنيگى 21 اقپاندا اقش-تىڭ ۆاندەنبەرگ اۋە بازاسىنا جەتكىزىلگەن. كاحرامانماراش پروۆينتسياسىنداعى جەر سىلكىنىسىنەن كەيىن ەلدە قالىپتاسقان جاعدايعا بايلانىستى ءتيىستى ءراسىم جاسالعان جوق.
IMECE جەرسەرىگى 2017 جىلى جاسالا باستادى. ول 680 شاقىرىم بيىكتە جۇمىس ىستەيدى.
سپۋتنيك پلانەتانىڭ بارلىق بۇرىشىنان سۋرەتكە تۇسىرە الادى، تابيعي اپات تۋرالى مالىمەت بەرەدى، كارتوگرافيادا جانە اۋىل شارۋاشىلىعىندا كەڭىنەن قولدانىلادى.
ازاماتتىق ماقساتتا دا، قاۋىپسىزدىكتى قامتاماسىز ەتۋ ماقساتىندا دا پايدالانۋعا بولاتىن سپۋتنيكتىڭ ەسەپتىك قىزمەت ەتۋ مەرزىمى - بەس جىل.
قۇرىلعىنىڭ سالماعى - شامامەن 700 كگ، كولەمى - 2x3, 1 مەتر.
ءبىرىنشى رەتتەن-اق ۇزىندىعى 1000 كم جانە ەنى 16,73 كم اۋماقتى سۋرەتكە تۇسىرە الادى جانە سۋرەتتەردى سەكۋندىنا 320 مەگابايت جىلدامدىقپەن جەرۇستى ستانتسياسىنا جۇكتەۋگە شاماسى جەتەدى.
