جاساندى ينتەللەكت جانە تسيفرلىق دامۋ مينيسترلىگى قاراشا ايىنىڭ سوڭىنا دەيىن «ياندەكس» كومپانياسىنىڭ 5 زاڭدى تۇلعاسىنا جوسپاردان تىس تەكسەرۋ جۇرگىزەدى. بۇل تۋرالى ۆەدومستۆو باسشىسى جاسلان ماديەۆ ايتتى، دەپ حابارلايدى «ادىرنا» ءتىلشىسى.
بۇعان دەيىن دەپۋتاتتار «ياندەكس» جۇيەسىندەگى اقاۋدان كەيىن قازاقستاندىقتاردىڭ دەربەس دەرەكتەرىنىڭ قورعالۋ دەڭگەيىن تەكسەرۋدى تالاپ ەتكەن بولاتىن.
«ەلىمىزدە تىركەلگەن «ياندەكس» كومپانياسىنىڭ بەس زاڭدى تۇلعاسىنا («ياندەكس قازاقستان» جشس، «Yandex Bastau» جشس، «ياندەكس. تاكسي كورپ» جشس، «ياندەكس. ەدا كازاحستان» جشس جانە «ياندەكس LLP») قاراشا ايىنىڭ سوڭىنا دەيىن دەربەس دەرەكتەردى قورعاۋ سالاسىنداعى قازاقستان رەسپۋبليكاسى زاڭناماسىنىڭ تالاپتارىن ساقتاۋ تۇرعىسىنان جوسپاردان تىس تەكسەرۋ جۇرگىزىلەدى»، – دەلىنگەن مينيستر جاۋابىندا.
تەكسەرۋ بارىسىندا زاڭناما تالاپتارىنىڭ ساقتالۋى جان-جاقتى زەردەلەنەدى. اتاپ ايتقاندا، دەربەس دەرەكتەردى ساقتاۋ تالاپتارىنىڭ ورىندالۋى، سونداي-اق كومپانيالاردىڭ ولاردى قورعاۋ ءۇشىن قابىلداعان ۇيىمداستىرۋشىلىق جانە تەحنيكالىق شارالارى قارالادى.
تەكسەرۋ قورىتىندىسى بويىنشا مينيسترلىك بەلگىلەنگەن تالاپتاردىڭ ساقتالۋىنا باعا بەرەدى. ەگەر زاڭبۇزۋشىلىقتار انىقتالسا، ولاردى جويۋ جونىندە ۇسىنىمدار بەرۋ جانە كىنالى تۇلعالاردى اكىمشىلىك جاۋاپكەرشىلىككە تارتۋ ماسەلەسىن قاراۋ سياقتى ءتيىستى شارالار قابىلدانباق.
