اسپاننان جاۋعان دوللاردىڭ ۆيدەوسىن ءبارىڭىز كورىپ ۇلگەرگەن شىعارسىزدار. نە دەگەن كوپ اقشا!
شىركىن-اي، تۇسىمىزدە دە كورمەگەن دوللارلار! كوپشىلىك كينو ءتۇسىرىپ جاتىر، رەكۆيزيت دەپ، ۆيدەوعا سەنبەپ ەدى.
سويتسەك، ەشقانداي دا كينو ەمەس ەكەن. ۇلتتىق قاۋىپسىزدىك كوميتەتى «سامۇرىق-قازىنا» قورىنىڭ باسقارما توراعاسى نۇرلان جاقىپوۆ پەن «قازاقستان تەمىر جولى» ۇلتتىق كومپانياسىنىڭ باسشىسى ەلجاس وتىنيەۆتىڭ ۇستالعانىن حابارلادى.
تەرگەۋ قۇپياسىنا بايلانىستى ءىستىڭ وزگە جاي-جاپسارى ازىرگە جاريالانعان جوق. بىردەن ايتايىن، ۇلتتىق قاۋىپسىزدىك كوميتەتى ەكى باسشىنى بەكەردەن-بەكەر ۇستاپ وتىرعان جوق. ولاردى ۇستاۋعا نەگىز بولعان دالەلدەر بار دەگەن ءسوز.
نەگىزى، بۇل – قاراپايىم قىزمەتكەرلەردىڭ ۇستالۋى ەمەس. اڭگىمە ەكونوميكامىزدا ايرىقشا ورنى بار ەكى ءىرى ۇلتتىق كومپانيانىڭ باسشىلارى تۋرالى. مەنىڭشە، بۇل وقيعا «زاڭ مەن ءتارتىپ» قاعيداتىنىڭ ءىس جۇزىندە جۇزەگە اسىپ جاتقانىن كورسەتەدى. ياعني، سىبايلاس جەمقورلىققا جول بەرگەن كەز كەلگەن ادام قىزمەتىنە، اتاق-ابىرويىنا نەمەسە بۇرىنعى ەڭبەگىنە قاراماستان، زاڭ الدىنداعى جاۋاپكەرشىلىكتەن بوساتىلمايدى. زاڭ بارىنە ورتاق. مەملەكەت ءۇشىن لاۋازىمدى تۇلعانىڭ مارتەبەسىنەن زاڭنىڭ ۇستەمدىگى ماڭىزدى.
پرەزيدەنتتىڭ ۇستانعان قاعيداتى، مىنە، وسى. توقاەۆ سىبايلاس جەمقورلىقتىڭ كەز كەلگەن تۇرىنە جول بەرمەۋ كەرەكتىگىن تالاي مارتە ەسكەرتكەن. ادىلەتتى قازاقستان قۇرۋدىڭ نەگىزگى شارتتارىنىڭ ءبىرى – جەمقورلىققا توزبەۋ، مەملەكەتتىك مۇددەنى جەكە باستىڭ پايداسىنان جوعارى قويۋ. دەمەك، مەملەكەت باسشىسى وسى ۇستانىمدى قاتاڭ باسشىلىققا الىپ كەلەدى دەپ تولىق سەنىممەن ايتا الامىز. بۇگىنگى ەكى شەنەۋنىكتىڭ ۇستالۋى مەملەكەت ەشكىمنىڭ لاۋازىمىن زاڭنان بيىك قويمايتىنىن كورسەتەدى.
جازيرا بەگالى
